Tasiilarmiuaqqat 50.000 koruuninnapput

Tasiilarmiuaqqat ornittakkami Amarngivammiittartut ulluni makkunani Kunngissap nulia Mary marloriaammik nuannaarutigaat.

Meeqqat Amarngivammiittartut allarpassuit assigalugit prinsiaqqap inunngornera nuannaarutigaat, tamatuma saniatigut allamik aamma nuannaarutisinneqarput tassami, kunngissap nuliata isummersuutigisimammagu meeqqat Amarngivammiittartut 50.000 koruuninik tunineqarnissaat.

Taama tunissuteqarnermut tunngaviuvoq, Royal Arctic Line-p aasaq umiarsuartaava `Mary Arctica`-mik atserneqarmat, kissaatiginartinneqarsimasoq pisoq tamanna nuannersunngortinniarlugu aningaasanik siunertamut ajunngitsumut tunissuteqartoqassasoq. Kingorna Kunngissap nulia isumasiorneqarpoq, aalajangerneqarporlu Amarngivat aningaasanik tunineqassasoq.

- Amarngivat nersualaagassatut maligassiuisuuvoq, meeqqanik ulluinnarni immikkut pisariaqartitsisunik ikiuinermut aamma isumassuinermut, taama oqarpoq, Royal Arctic-imi siulersuisuni siulittaasoq Jørgen A. Høy.

Tasiilami ornittakkami Amarngivami ningiu Susanne Mayer oqarpoq, tapiissutigineqartut atorfissaqartikkitik.

- Royal Arctic Line-p ikioreersimavaatigut, containeri atisanik atornikunik atoqqissinnaasunilli imalik akeqanngitsumik assartorlugu uagutsinnut tunniutereersimalerpaa. Atisat taakku maani Tasiilami aammalu nunaqarfinni Kuummiuni Kulusumilu agguaanneqareerput, taakkunani aamma ornittakkanik ingerlatsigatta.

Susanne Mayer tunissutigineqartunut qujaqaluni oqarpoq, aningaasaqarniarnerminni ajornartorsioramik tapersiinerit taama ittut meeqqat immikkut misigisaqartinnissaannut atorluassagitik.