Tasiilaq sullissilluartumik annaasaqarpoq: Gerda Vilholm toquvoq
Naalakkersuisuni aliatsaatigisatsinnik tusartinneqarpugut Gerda Vilholm toqusimasoq.
Naalakkersuisut siulittaasuat Kim Kielsen Gerda Vilholm 73-inik ukioqarluni toqukkut qimaguttoq eqqaaniarlugu taama allappoq.
Gerda Vilholm 1984-imi Tasiilamut pivoq silasiutinik pullartanik qullartitsisartunngorluni. Telestationimi 1987-imi pisortanngorpoq atorfigalugulu 1989-ip tungaanut.
Gerda Vilholm suliarpassuaqarpoq, 1990-imilu atuagaarniarfeerannguaq Neriusaaq ammarpaa ilaatigut takornariat ornitassaqarniassammata. Atuagaarniarfinnguaq meeqqat inuusuttullu aamma katersuuffigisalerpaat, Gerda Vilholmilu meeqqat atugassarititaat pillugit suliniuteqarluarsimavoq.
Gerda Vilholm oqaatsit pillugit immikkut piginnaasaqarsimavoq. Ilitsoqqussaralugu danskisut oqaatsimi saniatigut tuluttut tyskisullu oqalussinnaalluni siullermik kitaamiusut ilikkarpoq, Tasiilamiinnermilu Tunumiusut aamma oqaluttalerpoq.
Demokraatit sinnerlugit aamma politikkikkut suliniuteqarpoq.
Gerda Vilholm qiimasutut tunniusimasutullu eqqaamaneqassaaq. Inuusimavoq qanilaartoq inoqatiminut ajunngitsuliornissamik Tasiilamilu inuiaqatigiinnut asaqisaminut iluunngarluni iliuuseqarusuttoq.
Gerda Vilholm Tasiilamut 1984-imi tikikkami Gert Vilholmimik ateqarpoq, ukiulli arlallit qaangiuttut arnanngorluni suliaritippoq Gerdamillu ateqalerluni.
Gerdap taamaaliornera Tasiilami nunaqqataasunit akuerineqarlunilu tapersersorneqarpoq.
