Aningaasat immiaararsissutigineqartut atugarliortunut kiserliortunullu tunniunneqassapput.
Aningaasaateqarfik Smukfonden, festivalip sinneqartoorutaanik immiaaqqanillu tuniniaanermi aningaasaateqarfiusoq, suliniutinut arlalinnut 211.000 koruuninik aningaasaliivoq, taakkunannga 50.000 koruunit Tasiilap meerartaanut tunniunneqarlutik.
Skanderborg Festivalimi siorna aatsaat taamak kaaviaartitaqartigisoqaraluartoq festivaali amigartoortorpoq. Taassumalu kingunerisaanik Smukfondenimit aningaasat ukiormanna tunniunneqartut siornamut sanilliullugit ikinnerupput.
Tunniunneqartut siorna 655.000 koruuniupput.
- Isertitat apeqqutaallutik tunniussat nikingapput. Festivaalertitsineq iluatsilluarnissaa aningaasanillu isertitaqarluarnissarput neriuutigaarput, taava aappagumut tunniussat amerlanerussapput, festivalimi oqaaseqartartoq siulersuisunullu ilaasortaq Poul Martin Bonde oqarpoq.
Aningaasaateqarfik Smukfonden 2014-imi pilersinneqarpoq. Sinneqartoorutigineqartut 20 procentii suliniutinut tunniunneqartarput.
Aningaasat Smukfestimi kaaviaartitat amerliartorput. Isertitat siorna 135 millionit koruuniupput 2011-milu 40 millionit koruuniullutik.
/ritzau/
