Tasiilaq nukissiorfittaarpoq
Tasiilaq nutaavissuarmik erngup nukinganik innaallagissiorfittaarpoq. Erngup nukinganik nukissiorfittaarnerup nunatsinni aapparimmagu inuussutissarsiornermut naalakkersuisoq Johan Lund Olsen Tasiilaliarpoq atoqqaarfissioriartorlugu.
Erngup nukinganik nukissiorfittaaq Canadamiunit suliarineqartoq, 60 milliuuni koruunik akeqarpoq, Tasiilami nukissiorfiup pisortaa Henning Hjerresen radioaviisimut oqarpoq.
Taanna aamma oqarpoq Tasiilamiit kilometerit arfineq-pingasut ungasitsigisumi nukissiorfittaaq, Akittiit kuuanni inissisimasoq, nunamullu matuukkanik kabilinik Tasiilamut attaveqarpoq. Tasiilarmiut innaallagiaq pisariaqartitaat nukissiorfittaamit tunniussinnaallugu, pisortaq oqarpoq.
Tasiilap illoqarfiani innaallagissiorfik nutaanngilisimaqisoq ullormut ikummatissaq 5000 literi atortarpaa, taannalu maanna sipaarutaalissaaq. Innaallagissiorfinnguaq atorunnaartoq piareersimasuutigineqalissaaq.
Pisortatigoortumik nukissiorfittaaq ikikkiartorneqarmat qamuteralaat 25-t ippassaq atorneqarput, atoqqaartinneqareermallu Tasiilami innaalagissiorfik qimikkiartorneqartoq, Henning Hjerresen oqarpoq.
Akittiit kuuat nukkissiorfissatut ukiut 20-t matuma siorna nukissiorfissatut ilaatigut misissuiffigineqarsimavoq, tassalu nukissiorfittaaq ullormut 1200 kilowattinik nukissiorsinnaasoq ippassaq atoqqaartinneqarpoq.
Kujataani Qullortorsuarmi erngup nukinganik nukissiorfissap pingajussaa tullinnguulluni naammassiniarneqassaaq, Nanortalimmut Qaqortumut Narsamullu nukimmik pilersuisussaq.
