Naasunnguaq Ignatiussen Streymoy Kommuneqarfik Sermersuumi politikerinut tunniussassanik siorna novembarimi atsiortitseqattaarpoq. Asseq: KNR/DRAssi: KNR/DR

Tasiilaq: Atsiornernik katersisoqaraluartoq isumaginninnikkut siuariartoqanngitsoq

Tasiilami meeqqat inuusuttullu atugaat ilungersunartut iliuuseqarfigeqqullugit atsiornernik katersinerigaluit ulloq manna tikillugu malunnaataasinnaasumik qisuariarfigineqanngillat. Atsiortitsinernik katersuisoq piviusulersaarummilu peqataasoq oqaluttuarpoq.

Naasunnguaq Ignatiussen Streymoy Kommuneqarfik Sermersuumi politikerinut tunniussassanik siorna novembarimi atsiortitseqattaarpoq.

Tasiilami tarnip pissusianik ilisimasalimmik ilinniarsimasumik soqanngilaq, innuttaasullu aqqusaakkat imaannanngitsut pillugit  ilisimasalimmit saaffissaqanngillat. Tamannalu politikerinit iliuuseqarfigeqqullugu atsiornernik katersisoqarpoq.

Atsiornernik katersisoqarmalli maanna ukiup affaa qaangiussimalerpoq, sulilu arlaannaalluunniit qisuariaateqanngitsoq, Nasunnguaq Ignatiussen Streymoy nalunaaruteqarpoq.

AAMMA ATUARUK Meeqqat inuusuttuaqqallu pitsaanerusumik ikiorneqartarnissaat salliunneqarli

- Ajoraluartumik susoqanngilaq, naluara sooq. Soorluli illoqarfimmi ajornartorsiutigineqartut soqutigineqanngitsut, taanna KNR-imut allappoq.

Kinguaassiutitigut atornerlugaasimasut piviusulersaarummi nutaami sammineqartut

Nunatsinni ajornartorsiut aatsaat tusalinngisarput, Danmarkimi aamma takutinneqartussanngorpoq. DR-immi piviusulersaarutaa unnugu takutinneqaqqaartussaavoq. Tasiilameersup Naasunnguaq Ignatiussen Streymorip Tasiilami inuuniarnikkut ajornartorsiuteqartut pillugit sorsunnera piviusulersaarummi malinnaavigineqarpoq.

- Neriuutigaara illoqarfinni Tasiilami, nunattalu sinnerani pissutsit paasineqassasut, eqqortumillu ikiorneqarluta nukittunerusumik inissisimalerumaartugut, piviusulersaarummut neriuutigisani pillugit ilaatigut taama allappoq.

AAMMA ATUARUK Tasiilami inuusuttut imminut toquttarneq pillugu isiginnaartitsissusiortut

Tasiilami ilinniartitsisoq qallunaaq Rikke Blegvad piviusulersaarummi aamma malinnaavigineqarpoq, taassuma politikerinut oqariartuuteqarnissaq aamma anguniagaraa.

Taanna Tasiilami alivarpimmi ukiuni arfinilinni ilinniartitsisutut sulivoq, ukiunilu taakkunani Tasiilamiinnermini meeqqat inuuniarnermikkut ilungersuuteqartut arlallit ilisarisimasarai. Piviusulersaarummi saqqummiunneqartut malillugit Tasiilami meeqqat pingasuugaangata ataaseq kinguaassiutitigut kanngutsaaatsuliorfigineqartarpoq, meeqqallu marluugaangata ataaseq kommunimi isumaginnittoqarfimmi suliassanngortinneqarsimasarpoq.

Rikke Blegvad ullumikkut Danmarkimut uteqqinnikuuvoq, taanna ukiuni arfinilinni Tasiilamiinnermini ilungersorluni allanngueqataarusukkaluarpoq meeqqat inuunerat pillugu, ukiunilu taakkunani susoqarsimanngilaq, tamannalu Rikke Blegvadimut sakkortuallaalersimavoq.

Isumaginninnikkut siuariartortoqartoq

Tasiilami meeqqat ajornartorsiortut suliniuteqarfigineqarfigineqarnerat naammaginanngitsoq, Kommuneqarfik Sermersuumi borgmesterip Asii Chemnitz Narupip DR1-ip aallakaatitaani DR Søndagimi nassuerutigaa.

Tasiilamilu isumaginninnikkut ingerlanerliortoqaraluartoq innuttaasut peqqissusaannik 2018-imi misissuinermi sapaatit akunnerata siuliani saqqummersinneqartumi takuneqarsinnaavoq ukiut qulikkuutaat ingerlanerini pitsanngoriartortoqarsimasoq.

AAMMA ATUARUK Tasiilami meeqqanik inuusuttunillu sullissisussaaleqisut

Misissuineq naapertorlugu 1995-imi inunngortut tallimaagaangata ataaseq kinguaassiutitigut kannguttaatsuliorfigineqarsimasarpoq. Amerlagaluartullu 1970-ikkut naleqqiullugit affaat sinnerlugit ikileriarsimapput.

1970-ikkunni 1980-ikkunilu inunngortut 40 procentiisa missaat meeraanerminni kinguaassiutitigut kannguttaatsuliorfigineqarsimapput. Naalagaaffiup innuttaasut peqqissusaat pillugu misissuisoqarfiani siunnersortaaneq innuttaasullu peqqissusaannik 2018-imi misissuinermi suleqataasup KNR-imut marlunngornermi oqaatigaa.

- Suli amerlavallaarput, pitsaanerusumullu ingerlasoqarnera nuannersuuvoq Christina Viskum Lytken Larsen taama oqarpoq.

Piviusulersaarut taaguuteqarpoq " Byen hvor børn forsvinder", tassa illoqarfimmi meeqqat peeruffianni, unnugulu qulinut qiteqquppat DR-1-ikkut takutinneqassaaq, taannalu DR-p nittartagaaniilereerpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat