Tasiilaq ataqatigiilluarfiuvoq

Tasiilami ajornartorsiutit aaqqitassat naammattunnguupput, sulisussalli naammaqqajarnatik. Illoqarfimmilu ajornartoriuteqaraluaqisoq inuiaqatigiit nukittuffippassuaqarput.

Oqarasuaat sianiinnaavippoq, anaanaasorlu naalungiarsuumminik qiasumik kissumiarluni ullup sinneranut inuussutissaminik qinnuteqarpoq. Tasiilami isumaginninnermi sulianik ingerlatsisumut tamanna ulluinnarsiutaavoq. Illoqarfimmi tassani politiit nunami pinerluttut ajornersaasa ilaat sulinerminni sammisarpaat, taakkulu immaqa qaqqami annaassiniarnermi ikiuuttarput.

Ajornartorsiutit tusagassiuutini eqqartorneqartaqisut aamma politikerinit innuttaasunillu oqallisigineqartaqisut iluarsiiffiginiarlugit inuit suliaqartut amerlaqisut ilaat naapinniarlugit KNR Tasiilamiippoq.

Jannick Grey illoqarfimmi politikommissæritut atorfeqarallartoq isumaqarpoq Tasiilami inuiaqatigiinni inissisimaneq inuit akornanni apeqqutaatinneqarneq ajortoq.

 - Tamaani matut tamarmik inunnut tamanut ammapput, oqaluttuarpoq.

Suleqatinilu innutaasut 20 procentiisa missaat sulinerminni sammisarpaat, tassaappullu inuiaqatigiit pissutsini nuanniitsumi inissisimasut. Sakkortusinnaavoq, kisianni tamanna nutaajunngilaq, erseqqissaavoq.

- Suliat taama amerlatiginerat ilungersunartuuvoq, ilungersunarnerali sungiusimavarput, piujuarsimammatami. Imaanngilaq tusagassiuutini saqqummiunneqaramik ilungersunarnerulersut, oqaarpoq.

Meeqqat ammariartulerput 

Sara Kristensenip Tasiilami Meeqqanut Ilaqutariinnullu Sullissivimmi sulianik ingerlatsisup suliat  ilungersunarnerat aamma misigisaraa.  

- Aallaqqaammut immaqa ukiup affaa sakkortoqaaq uannut. Sulisut amigangaaratta saniatigut isaasut. Isaaginnaavillutik iserlutik oqariartorlutik pisariaqartitsivugut atorfissaqartitsivugut saniatigut telefoni, oqarpoq.

AAMMA ATUARUK Tasiilami meeqqat ersarissumik isummersorsinnaalissasut

Sara Kristensen oqaluttuarpoq ajunngitsumik ineriartorneq illoqarfimmi ingerlalluartoq. Tassami meeqqat inuusuttullu ammaneruleramik ajornartorsiutitillu pillugit ammanerusumik oqaloqatigiissutigisinnalersimallugit. Tamannalu nukiuvoq ingerlaqqinnissamut atorneqarsinnalluartoq.  

Pisariaqaleraangat inuit ataqatigiilluartarput

Politikommissæri aamma isumaqarpoq ulluinnarni pisut sakkortuut ulluinnarni misigisanut ilaasut anigorniarlugit suliarinissaannut ingerlariaqqinnissamullu Tasiilami inuit piginnaaneqarluartut.  

- Illoqarfiuvormi ajuvissunik pinerluttoqartaraluartoq isumakkeerfiginninnerpaaffiusunut ilaasoq, taamaanngippammi inuit ullut tamaasa naapittuarsinnaanavianngikkaluarput. 

KNR Tasiilami                                                                   KNR ulluni aggustip 21-aniit 24-anut Tasiilamiippoq, ilaatigut Kommuneqarfik Sermersuumit aningaasaliiffigineqarluni. Angalanermi KNR tusagassiornikkut tamakkiisumik kiffaanngissuseqarluni sulivoq.

Jannick Greyip nammineq suliffimmini pinngitsaaliiilluni atoqateqarsimasumik suliaqarnikuuvoq nalunaaquttallu akunnialunngui qaangiummata qaqqami naapissimallugu, qimussimillu ajutoornermi imminnut ikioqatigiittariaqalersimallutik. Tasiilami tassa taamaappoq, aalajangersarpaa.

- Inuiaqatigiinnguit tamarmik ataqatigiissinnaasut misigaara. Ajornartorsiortoqalerpallu ikiuukkumasut imaaginnavittarput, politikommissæri oqarpoq.

LÆS OGSÅ Kommunip, politiit Namminersorlutillu Oqartussat Tasiilaq pillugu suleqatigiinneq nutaaq aallartikkaat

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat