Tasiilap TIMI ASIMI tikilluaqquaa
Tasiilami inuusuttut suliffissaaleqinerat qaffasissupilussuuvoq, taamaammat inuusuttut ilinniagaqalersikkusullugit kajumissaarnissaat pisariaqarpoq. Tamanna TIMI ASIMI-p nukittuffiisa pingaarnerit ilagaat, inuusuttullu ilinniagaqarusulernissaannut iluaqutaalluartarluni.
TIMI ASIMI-p sapaatit akunnerinik 12-inik sivisussuseqartup peqataaffigineratigut inuusuttut Tasiilami Piareersarfimmi toqqaannartumik ilinnialersinnaanngussapput. Inuusuttut suliffissaaleqisut sapaatit akunneri 12-it atorlugit annertuumik timersortinneqassapput inuttullu ineriartornissamut suliakkiissutigineqartut piginnaaneqalersitsisussat atorlugit inuusuttut piumassusaannik kajumissusaannillu pitsanngorsaasoqarsinnaalluni.
-Pitsaaliunermik suliaqarnerput TIMI ASIMI-p ingerlanneqarneranut ilaareerpoq, TIMI ASIMI-lu siullerpaamik Tasiilami politiit ikiortiterisimavai, taakkulu inuusuttut sapaatit akunneranut nalunaaquttap akunnerini pingasuni crossfittertillugit ikiussavaat. Suliniut taanna nuannaarutigeqaarput aamma Kalaallit Nunaanni Politiinit ilassilluarneqarpoq, Kim Godtfredsen, suliniummik ingerlatsisoq oqarpoq.
Suliniut Namminersorlutik Oqartussanit aningaasalersugaavoq, ingerlatsinermullu tunngasut suliassallu allat Nuummi Piareersarfiup Tasiilamilu Piareersarfiup suleqatigiillutik isumagissavaat.
