Tasiilap borgmesteria: Imminortarneq matusinikkut qaangerneqarsinnaanngilaq

- Tasiilami imigassaq kimittooq matuneqarli, ullup qeqqanut radio aviisimi ilaatigut taama oqarpoq Tasiilami politiit pisortaat Kristian Sinngertaat. Taassuma taama siunnersuuteqarnerminut tunngavigaa Tasiilami piffissami kingullermi imminoriarnerit arlalippassuit pisimammata imigassarlu kimittooq tamatumunnga tunngaviusoq oqaatigalugu. Politeeqarfiulli pisortaata taama isumaqarnera Tasiilami borgmesterip Vittus Mikaelsenip isumaqatiginngilaa.
juunip 10-at 2008 16:02

- Matusinissaq akuersaarsinnaanngilara, Vittus Mikaelsen oqarpoq.

Taanna tunngavilersuivoq avinngasimasumiittut Illoqqortoormiut Qaanaarlu assigalugit matusisoqassappat tamatuma eqquutsinnissaa ajornakusuussasoq pissutigalugu Tasiilaq timmisartukkut angallaffittut Kalaallit Nunaanni ammarnerpaat ilagimmassuk imigassanik bestiiliinerit isertortumillu eqqussuinerit pilissasut.

. Imigassaq pillugu misilittagarpassuaqarpugut 1900-kkunni qasseriarluni matusisaqattaartoqarnikuuvoq, matusereernerulli kingorna imigassaq ammaqqikkaangat ullut siulliit assut imertunik ingerlatsiviusarput, oqarpoq.

Tasiilami kommunalbestyrelsep piumasarisaanik Tasiilami innuttaasut imigassap matuneqarnissaa pillugu maajip 29-iani taasitinneqarput. Amerlanerussuteqartullu matusisoqannginnissaanik taasisimasut Vittus Mikaelsenip oqaluttuaraa.

-2007-mili taanna eqqartoqattaarparput, februaarimilu aalajangerpugut innuttaasunik taasisitsiniarluta tamannalu maajip 29-iani pivoq, amerlanerussuteqartuniillu matusisoqarnissaa kissaatigineqanngilaq, oqarpoq.

Vittus Mikaelsen aamma erseqqissaavoq, imminornermik ajornartorsiut imigassap matunerinnaatigut qaangerneqarsinnaanavianngitsoq.

- imigassaq matuinnarlugu imminortarnerup qaangerneqarsinnaanera upperinngilara, taamaattumik kommunalbestyrelsep aalajangernera uanga ataqqilluinnarpara, oqarpoq.

Vittus Mikaelsen aamma oqarpoq piffissap taamaalinerani Tasiilami suliffissaaleqinerujussuaq pilertarmat Tasiilami imminornerup atugaanerujussuanut tamanna tunngaviunngitsoornavianngitsoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq