Tasiilamit kissaateqarneq: Umiarsuarmik igalaanik illullu qaliinik useqartumik allamik tikisitsigitsi
Tasiilami sapaatip akunnerata siuliani piterarmat igalaat illullu qalii aserorterneqarput.
Tasiilami Isert A/S-ip inissiaataani igalaanik 120-t 130-llu akornanniittunik taarsersuineq sapaatit akunnerani uani aallartissaaq. Siunissamilu piteqqap ajoqusiiumaarnissaanut sillimmateqartariaqarlutik Justus Hansen oqarpoq:
Kommunip inissiaatileqatigiiffiannit Iserimmit inissiani igalaat 120-nit 130-nut amerlassuseqartut taarsersorneqassapput. Taamaammat sanaartornermi atortussanik useqartumik umiarsuarmik immikkut tikittoqarnissaa pisariaqartinneqarpoq.
Kommuneqarfik Sermersuumi borgmesterip tullersortaa, Justus Hansen (Demokraatit) Tasiilamilu najugaqartoq naliliivoq. Kommunip Tasiilami immikkoortortami pisortaa isumaqataavoq.
- Decembarimi umiarsuarmik tikisitsisinnaanersut allakkatigut toqqaannartumik aperaakka. Decembarimi sapaatip akunnerini siullerni imaluunniit decembari qiteqqutereerpat umiarsuarmik igalaassanik usisumik tikittoqarsinnaappat pitsaanerpaassaaq, Justus Hansen KNR-imut oqarpoq.
Umiarsuaq kingulleq qaammatip tulliani tikissasoq
Tasiilaq novembarip tallimaanni ukioq manna kingullerpaamik umiarsuaqarnissaa pilersaarutaavoq. Illunilli piteqqap ajoqusigarpassuinik iluarsaassinissamut atortussat tassunga ilaallutik tikissanersut qulakkeerneqanngilaq.
Hjørdis Vibergip Royal Arctic Line aamma attaveqarfigaa.
AAMMA ATUARUK Op til 130 vinduer skal skiftes i Tasiilaq efter piteraq
- Igalaassat inniminnerneqarpata maannga tikinnissaannut piffissaq sivisusinnaavoq, taanna KNR-imut oqarpoq.
- Verner Hammeken Royal Arctic Linep pisortaa oqaloqatigaaraa, nalunngilaralu maanna periarfissanik misissuisut, Hjørdis Viberg oqarpoq.
Taassuma akissutersinissani maanna utaqqivaa.
Hjørdis Viberg. Assi: Johannes Olsen
Kommuni illuni igalaalersuilluni sapaatip akunnerani matumani aallartissaaq. Inuit angerlarsimaffii nutaanik, ningusuunik igalaalersorneqassapput, taakkulu ujaqqanit allanillu eqqorneqarsinnaasuussallutik. Ukiungajalerpoq arlaleriarlunilu piteraqqittussaassallunilu. Taamaammat Tasiilami igalaanik sillimmateqartariaqartoq, Justus Hansen isumaqarpoq, ukiummi ingerlanerani piterarneranit aseroqqissinnaapput.
- Piteraqqittartussaavoq neqqajaaqqittartussaalluni persertartussaallunilu. Taamaammat illut igalaaqarnissaat pisariaqarpoq, Justus Hansen oqarpoq.
Aqqusinermi qulliit uppittut
Tasiilami septembarip 24-ata 25-atalu akornanni piterarpoq. Anorip sakkortunerpaanerani tassa sekundimut 50 meterinik sakkortussuseqarnerani angallatit anorimit teqqaasinneqarput. Illoqarfiup aqquserngini qulliit uppipput innaallagiaarullunilu. Igalaat sioqqanit ujaqqanillu teqqaasunik aserorterneqarput.
AAMMA ATUARUK Tasiilami piterarmat illut ilaat innarlerneqangaatsiarpoq
Inuit 47-t unnuap ingerlanerani qimagussortinneqarput, qujanartumillu ajoqusertoqarani. Tasiilamili najugaqartorpassuit maanna igalaaqaratillu illui qaleqanngillat. KNR-ip ilaqutariit taama nalaataqartut pulaarpai. Illumi inuit katillugit aqqanillit najugaqarput, illup qalia tingissimavoq, illullu qaliani putorujussuaqalerluni.
Illu maanna ulissimavoq.
- Taamannak ukiiffugissagutsigu atorsinnaanngilaq. Ukiukkummi piterakkajuttaqaaq, piteqqippammi nalunngilara arlaatigut ammaqqissasoq putoqqissasorlu. Taanna ilungersunaqaaq, Ulrikke Ertaq KNR-imut oqarpoq.
