Tasiilami viinneerullunilu immiaaraaruppoq
- Tallimanngormalli nunguutsivugut, taamaattumik innuttaasut tikittoqaqqinnissaanut naammagittartariaqarput, Pilersuisumi tuniniaasartoq Steen Jensen sermitsiaq.ag-mut oqarpoq.
Nioqqutissanik pajuttoq Tasiilamut juunip 13-ianni tikissaaq.
Tasiilami viinneerullunilu immiaaraarunneranut qarasaasiaq atorlugu inniminniiniarneq nutarterneqarsimasoq pissutaavoq.
- Qarasaasiaq atorlugu inniminneeriaaseq nutarterneqarmat takunngitsoorsimavarput immiaaqqanik inniminniinikippallaarsimalluta. Immiaaqqat nungummata inuit viinnisisalerput, taamaammat aamma taakku nungupput. Innuttaasut naammagittartariaqarput, umiarsuarmi pajuttoq juunip 13-ianni tikissaaq, nalunngilaralu immiaaqqanik viinninillu useqarumaartoq, Steen Jensen oqarpoq.