Tasiilami utoqqaat kommunimit sipaarniarfiupput
Utoqqaat Illuanni najugallit 18-it tamangajammik ima paaqqutarisariaqartigipput, Utoqqaat Illuanniinnatik immikkut isumagisarialittut plejehjemimiittariaqaraluarlutik, Peqqinnissakkut Nakkutilliisoq apriilimi Tasiilameereerluni nalunaarusiamini taama inerniliivoq.
Utoqqaat Illuat utoqqarnut imminnut ikiorsinnaasunut qulinut sanaajuvoq, apriilimilu najugaqartunit 17-18-iusunit qulit assakaasulinni issiasuupput marlullu puiguttornermik nappaateqarlutik.
- Najugaqartunit marluinnaat imminnut ima ikiorsinnaatigipput utoqqaat illuanni najugaqartussatut tulluarlutik, nakkutilliisoq taama allassimanerarlugu Sermitsiaq allappoq.
Nakkutilliisup tikkuarpaa, utoqqaat 16-inik sulisoqarnissamik pisariaqartitsigaluartut maanna qulingiluanik sulisoqartoq, marluinnaallu peqqinnissap tungaatigut ilinniagaqarsimasuullutik.
Sulisut marluk ulloq unnuarlu pisariaqartinneqarput, taamaattumik sulisut qulingiluaannaanerat amigarluinnartutut nakkutilliisup nalilerpaa.
Borgmester Vittus Mikaelsenip kommunimi utoqqarnik isumaginninnerup sipaarniarfiusimanera miserratiginngilaa.
- Innuttaasut tamarmik sipaarniarnermit eqqugaapput, borgmesteri oqarpoq.
Maanna Kangia/Kitaata kommuniata ajornartorsiut iliuuseqarfigisussanngussavaa.