Tasiilami toqutsisoqarpoq
Tasiilami politiit sapaatip-akunnerata uuma aallartinnerani toqutsineq suli paasiniaavigaat.
Angutip 43-nik ukiullip nuliakuni marsip 21-iani marlunngornerup unnuaani toquppaa.
Tasiilami politiit pisortaat Kristian Sinngertaat nassuiaavoq, angut sangiannermik peqquteqartumik toqutsisimasoq nuliarisimasaa allamik angutaatitaarsimammat.
Arnaq toqutaasoq aqqusiniinnarmi inuit angallaffianni iggaviup savianik uikuminit sisamariarluni kaporneqarpoq.
Tasiilami politiit napparsimaviimmiit sianerfigineqarput, angummik napparsimaviliartoqarsimasoq arlaannillu nalunaarniarunaraluartoq qiangaarmat paasisinnaasimanngikkitsik. Politiillu takkummata angutip 43-nik ukiullip nuliakuminik toqutsisimanini erngerluni oqaatigaa.
Angut toqutsisimasutut sapaatip-akunnerini sisamani tigummigallagassanngortinneqarpoq.
Nuummilu politiineersoq Søren Jæger oqarpoq toqutsinermut takunnittuusimasut maanna killisiorneqartut. Taamatuttaaq oqaatigineqarpoq illoqarfiup nakorsaata maanna nalilersoraa angutip sianissutsimigut akornuteqarsinnaanera misissortariaanersoq.
