Tasiilami toqutsineq

Tasiilami politiit arnaq 33-nik ukiulik sapaatip akunnerani kingullermi, toqungasoq nassaarineqartoq qimminillu innarlerneqarsimasoq, suli misissuiffigaat.

Massakkut Tasiilami politiinit inuup sananeqaataanut ilisarnaatitut takussutissat Københavnip Universitetiani, inuit sannaannik misissueqqissaartarfimmut misissugassatut nassiussat inerneri utaqqineqarput.

Matumani pineqarput toqutsiffiusumit inuup sananeqaataanut ilisarnaatitut takussutissat, arnamit 33-nik ukiulimmeersut aamma angummit septembarip arfernanniilli pasisatut tigummineqartumeersut.

- Inuit sannaannik misissueqqissaartarfimmiit misissuinerit inerneri sapaatip akunnerini marlunni imaluunniit pingasuni utaqqisinnaasarpavut. Utaqqinitsinni ilisimannittunik killisiuisarpugut toqutsinerullu tungaanut arnap pasineqartullu sumiissimanerat paasiniarlutigu, Tasiilami politiit pisortaata tullia Michael Poulsen oqarpoq.

Politiit pinerluttoqarsimatillugu misissueqqissaartartui sapaatip akunnerani kingullermi misissueqqissaariartorlutik Tasiilamiipput. Misissueqqissaarnerup inerneri sorliit avammut saqqummiunneqassanersut Tasiilami politiit aalajangigassaraat, suliamullu matumunnga tunngatillugu saqqummiussisoqanngingajappoq.

- Suliaq suli misissuiffigineqarmat annerusumik oqaaseqarfigisinnaanngilara, Michael Poulsen oqarpoq.