Tasiilami toqusoqarnera ajutoornikkut pisimasinnaavoq

Arnap 63-nik ukiullip sapaatip akunnera kingulleq toqunerat toqutsinertut suli paasiniaaffigineqarpoq. Ajutoornikkulli tamatuma aamma pisimasinnaasoq politiit nalunaarput.
Allattoq Noah Mølgaard
decembarip 10-at 2012 11:50

Toqusut timaannik misissuisartoq pinerluttoqarsimatillugulu paasiniaaqqissaartartut arnap 63-nik ukiullip sapaatip akunnerata naanerani siuliani pisumut tunngatillugu Tasiilami misissuereerput. Maannamut suli tigusarinnittoqanngilaq.

- Suliaq toqutsisoqarsimaneratut suli misissorparput. Aammali imaassimasinnaavoq ajutoornikkut arnaq toqusimassasoq, Sermersuumi politiini vicepolitikommisær Janus Eigaard KNR.gl-mut oqarpoq

Arnaq 63-nik ukiulik Tasiilami imerniartarfiup 'Klubben'ip silataani toqungasoq siumorneqarpoq sapaat decembarip aappaat nalunaaqutaq 05.00-ip aamma 06.00-ip akornanni. Arnaq kiinnamigut assut ajoqusersimavoq taamaammat toqutsisoqarsimasinnaaneratut suliaq politiinit paasiniaaffigineqarpoq.

Toqusut timaannik misissuisartoq aamma pinerluttoqarsimatillugu paasiniaaqqissaartartut Tasiilami misissuinertik naammassereerpaat. Misissuinernit katersat misissoqqissaarnerannit nalunaarut politiit suli utaqqivaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq