Tasiilami timigissartarfik pilersippaa
Illoqarfiup qeqqani sumiiffik inoqannginnersaajuarsimasoq maanna inunnik ornigarneqarluarluni uumassuseqarlualerpoq. Meeqqammi inersimasullu timigisartarfittaavat illoqarfimmiunit tamanit suleqataaffigineqarluni pilersinneqarpoq.
-Sungiusarfissannik amigaateqarlunga sungiusarfiusinnaasumik sananissamik isuma ineriartortippara. Isumassarsiamullu tunngatillugu suleqataarusullutik soqutiginnittut amerlasimaqaat. Atortussanillu katersisinitsinni, ilaatigut atoreernikunik suliffeqarfinniillu tunissutigineqartunik pissarsivugut. Piffissarlu sivisooq atorlugu silami sungiusartarfissaq suliarivarput. Maannalu silami timigissartarfeqarnera isigissagaanni naammassinissaata tungaanut sulerulussimaqaagut, Patrick Abrahamsen, isumassarsisuusoq annertuumillu nammineq piumasutsiminik sulisimasoq taama oqaluttuarpoq.
Tasiilap illoqarfiani sunngiffimmi sammisassaqartitsiniarnermi inspektøri suleqataalluarsimaqaaq. Sanaartornissamullu akuersissummik tunineqarnissami kommunemut attaveqaataalluarsimavoq, suliamillu naammassiniaanermi kommuneqarfik Sermersooq ikiuutaalluarsimavoq.
-Suliap aallartinneraniilli isumaasimavoq timigissartarfiup kommunemut tunniunneqarnissaa, tamannalu taperserorluarneqarpoq. Sunngiffimmi sammisassaqartitsiniarnermi inspektøri Harald angutititsialassuu- voq, suleqataalluarsimaneranilu qutsavissaalluarpoq. Ikinngutigilluakkannullu Jaaku Andreassenimut aamma taama qujarusuppunga, taannami aamma sulingaatsiarsimavoq. Taama suliaqarnitsinni inuit nuannaarnerat takullugu nuanneqaaq, pingaaruteqarluarporlu inuiaqatigiinni inoqarfiuallaanngitsuni ataqatigiilluarluni suleqatigiissinnaaneq, Patrick Abrahamsen nuannaarlunilu tussunngusoq taama naggasiivoq. Patrickimmi Tasiilami politiitut sulinerminit illoqarfimmut allamut nuulluni suliartortussanngorluni illoqarfik qimangajalerpaa.
