Tasiilami suliffissaaleqisut amerlisut
Sulisartut utoqqaanerusut akornanni suliffissaaleqisut amerlisimapput allalli eqimattat ukioqatigiiaat suliffissarsiortut ikileriarsimapput. Nuannaarutigineqarsinnaasut ilagaat Kalaallit Nunaanni inuusuttut akornanni suliffissaaleqisut amerliartorsimanerat unikaallammat.
Nunatsinni illoqarfiit pingaarnersaani Nuummi suliffissaleqisut ikileriangaatsiarsimapput qaammat kingulleq suliffissaaleqisut 811-usimasut uani qaammammi 637-ingorsimammata. Illoqarfinni allani anginerusuni suliffissaaleqisut amerlassusaat allanngorpiarsimanngillat. Tunumi illoqarfik Tasiilaq eqqaassanngikkaanni. Ukioq kingullermut naleqqiullugu Tasiilami suliffissarsiortut marloriaatinngorsimapput suullu pissutaanersut kommunimiit oqaatigisinnaanngilaat.
- Pitsaasumik nassuiaateqarfigisinnaanngilakkit. Suliffeqarfiit imaluunniit suliffeqarfissuit angisuut matuneqarnikuunngillat, taamaammat nassuiaammik paasiuminarsinnaasumik peqanngilaq. Isumaqarpunga pissutaasinnaasoq inuit suliffissaaleqisutut nalunaarsortinnissaminnut pikkorinnerulersimanerat, aamma iluaqutaassagunaraluarpoq inuit amerlanerusut suliffissarsiuussisarfinniittuuppata. Suliffissaaleqisut taamaalillugit ikiorneqarnissaat pitsaaninngussagaluarpoq, Justus Hansen (D) Kommuneqarfik Sermersuumi suliffeqarnermut ataatsimiititaliami ilaasortaq aamma Tasiilami najugaqartoq oqarpoq.
Nunatsinni illoqarfiit inerisarneqartut ilagaat Tasiilaq tamannali suliffissarsiortunut nalunaarsuukkat takullugit paasiuminaappoq. Ukioq manna oktobarimi illoqarfimmi inuit 223-it suliffissaaleqipput. Piffissami tassani ukioq kingulleq suliffissaaleqisut 113-iupput. Piffissami tassani ilaqutariit nunaqarfimmiit illoqarfimmut nuussimasut amerlapput. Meeqqat atuarnissaat pillugu tamanna pivoq.
- Illoqarfimmi annertuunik sanaartugassanik suliassinneqartartoq ilungersunartorsiorpoq tamannalu suliffissaaleqisut amerlassusaanut sunniuteqalaarpoq, aamma sunniuteqarsimassaaq Kuummiuni aalisakkeriviup suliaqartitsinissap attatiinnarnissaanut pisariaqartinneqartunik aalisakkanik pilersorneqarsimannginnera. Sapinngisarput malillugu Tasiilami suliffissaqartitsinissaq sulissutigivarput, Justus Hansen knr.gl-imut oqarpoq.
Tasiilami suliffissat amerlinissaanut suliniutit amerlisarneqassappata takornariaqarnerup tungaatigut suliniuteqartoqartariaqarpoq. Tassanili assigiinngitsut aporfiupput. Soorlu kiffartuussinissamut isumaqatigiissutip nutaap kinguneraa Tasiilamukarniarnerup ajornarnerulernera. Destination East Greenlandili Tunumi takornariaqarneq siuarsarniarlugu annertuumik suliniuteqarpoq.
- Iluaqutaanerpaassaaq Tasiilami mittarfeqalertuuppat taamaalillutik inuit tiimerpassuit Kulusummi suliaqaratik utaqqeqqaarlutik qulimiguulimmik Tasiilalaliartassanngikkaluarmata. Nuannaarutigisorujussuuarpulli Air Icelandip timmisartuussisarnini ingerlatiinnarmagu, aamma naak Namminersorlutik Oqartussat angallassinissamut isumaqatigiissut allanngortikkaluaraat, Justus Hansen nassuiaavoq.
