Tasiilami silasiutinik qullartitsiniartut
Qullartitsissutit tassaapput uuttortaatit mikisunnguit, pullattakkat heliumballonit ikiorsiullugit 32-miit 35 kilometerit qullartinneqartartut, taama qutsitsigisumut pigaangamik pullatakkat taakku qaartarput. Silamik nalunaarsuutit arlallit pullattakkamiit DMI-mut nassiussorneqartarput, nalunaarsuutillu taakku DMI-p atortarpai.
DMI-mit oqaatigineqarpoq Tasiilaq misileraaffigissallugu pitsaanerpaasoq, illoqarfimmi taanna ukiukkut apportoorujussuuvoq, aamma 25-t tikingajallugit ississinnaasarluni, Tasiilamilu aamma sakkortoorujussuarmik piterartarpoq.
Suliniummi akisussaasoq, Thomas Nedergaard, ilisimatitsivoq, 1996-imi piterallarmat silasiutinik qullartitsisarneq unitsinneqarsimasoq. Teknikkikkut atortut taamani piterarmat aseruatitersimapput.
- Tasiilamili silarluttarnerujussua eqqarsaatigalugu robotsonde maanna nungullajaatsunngorsarneqarsimavoq. Nunami mekanikki elektronikkilu containerinut isikkanik 20-nik takissusilimmut, qaqqamilu isumannaatsumik inissinneqarsimasumut, poortorneqarsimapput.
Silasiutit qullartittakkat nutaat ullormut marloriarlutik qullartinneqartassapput.
Silasiutinik Tasiilami qullartitsisarfik - taamani inunnik sulisoqartoq - oktobarip ulluisa 26-anni 1947-imi siullermeerluni qullartitsivoq. Sila pillugu paasissutissat taamani maannalu silaannakkut angallannermi ajutoortoqannginnissaanut iluaqutaasorujussuusarput.
