Tasiilami piterartarnera akulikilliartorpoq

Tasiilami ulluni kingullerni piterarpoq. Meeqqeriviit, atuarfik, pisiniarfiit ilami suut tamangajammik matoqqaapput, inuillu amerlanerit angerlarsimapput.

Piterartillugu Tasiilarmiut susarpat? Piterarlu sunaana? Tamakku nassuiaatissarsiorlugu Anna Kûitse Kúko sianerfigaarput, oqaluttuarporlu aput qalleq perserluni nungulersoq, sulili piteraq sakkortulluni takkuttartoq.

Piteraq anoraavoq sermersuarminngaanniit aqqarsaartartoq, nalliusimaarnerminilu sakkortusaqaaq. Islandip nunattalu akornanni naqitsiniisaffeqaraangat, piteralertussanngornera Tasiilarmiut ilisimalereertarpaat.

-Neqqajaamik taasagarput anori illuatungaaneersoq nittaalamik nassataqartartoq sakkortusigaluttuinnarpoq, taamaattoqarneranilu naqitsiniisarfik nunatta Islandillu akornaniileraangat anorip illuanut saannialeraangat piteralernissaa ilimatsaattaritsik Anna Kûitse Kúko oqarpoq. Nunatsinni innuttaasut inersimasuunerusut eqqaamagunarpaat 1970-p aallartisimalernerani piterarujussuallarmat, illut qaliaat teqqaallutik, anorersuullu aseruatitigigai amerlaqaat. Anna Kûitse Kúko oqaluttuarpoq 1998-mi kingumut taama sakkortutigisumik piterarsimasoq.

Piteraq sakkortungaarmat annilaangasimanerarput, imiup tankersua tonserpassuarnik oqimaassusilik uppissimavoq, napparsimmaviup igalaavi qaararsimapput, qisuillu salliligaminersuit illunut kappussuussimapput, qimmillu matoorussaallutik toqusimallutik.

Anna Kûitse Kúko isumaqarpoq piteqqap sammivia illuaallassimasoq, anoritaalu sakkortusigaluttuinnartoq.