Tasiilami pinaveersaartitsinermik aallartitsilersut
- Unioqqutitsinernut pinaveersaartitsinermik sullissinerput nukittorsarniarlugu illoqarfinni anginerusuni pinaveersaartitsisussarsiorluta aallartippugut, politiitut suliaqartut pisortaata tullia Viggo Johansen oqarpoq.
Tasiilami aallartissasut
Politiit 2017-mut kisitsisaataat naapertorlugit suliassat 4221-it kalerriutigineqarput, taakkualu 2016-imut sanilliukkaanni 420-nik ikinnerupput. Tassalu kalerriutigisat ikinnerpaaffiisut 2015-imeersutut amerlassuseqaleqqipput.
Inatsisaatsuliornernik kalerriutit ikiliartorput, politiilli ilorrisimaalissanngillat.
Tasiilamilu aallartinniarput.
- Kisitsisaatitsinni takusinnaagatsigu Tasiilami massakkoqqissaaq pisariaqartitsisoqaqisoq. Aammami siusinnerusukkut takusinnaareeratsigu Tasiilami pinaveersaartitsinissaq pisariaqartoq.
AAMMA ATUARUK Tasiilami inuusuttut nipangersimaneq isiginnaartitsinikkut unitsinniaraat
Tasiilami kalerriutigineqartut siorna 237-upput.
Pinaveersaartitsisup Tasiilami Ittoqqortoormiinilu pisut, soorlu aanngajaarniutinik atornerluinerit kinguaassiutitigullu kanngutaatsuliornerit malinnaavigissavai suliniummilu "Angerlarsimaffiup iluani nakuuserata oqaloqatigiitta"-mi aqutsisussaalluni:
- Taavalu aamma suleqatissat allat, soorlu assersuutigalugit kommuni, peqqinnissaqarfik atuarfiillu suleqatigalugit pilersaarusiortarnissaq pinaveersaartitsinernilu ingerlatsisarnissaq taassuma suliassaanut ilaapput.
AAMMA ATUARUK Tasiilami politiit innuttaasunik oqaloqateqartarneq iluaqutigigaat
Pinaveersaartitsinermik sukumiinerulernera kisitsisitigut takusinnaalissallugu neriuutigigitsik, Viggo Johansen oqarpoq:
- Inuit pisariaqartitsisut aamma ikiorserneqartarnissaat sammisussaassagatsigu.
Kalaallit Nunaanni politiit Nuummi, Qaqortumi, Sisimiuni, Aasianni Ilulissanilu pinaveersaartitsisoqalissapput.
Taakku ukioq manna inuttalersorneqarnissaat naatsorsuutigigitsik, politiit pisortaata tullersortaa oqarpoq.