Tasiilami nunap sisoorfiata eqqaani najugaqartut: Toqqissisimanngissutigaarput
Tasiilami inissiaqarfiup qanittuani nuna ataasinngornermi unnukkut sisoorpoq. Nuna 15 meteritut silissuseqartoq najugaqarfimmut Sara Helmsip Aqqulaaniittumut nalunaaqutaq 18.30-p missaani sisuvoq.
Debora Aminak 24-nik ukiulik nunap sisoorneranik malugisaqanngilaq, aatsaallu anaanaavata pujortariarnerani paasisaqarlutik.
- Nuna ippassaq sisoorami, soorunalimi annilaarnarpoq. Anaanaga pujortariarluni oqarami nuna sisuungaatsiarsimasoq, inissiamut apungajavilluni, Debora oqarpoq.
AAMMA ATUARUK Tasiilami nunap sisoornera 15 meterinik silissuseqartoq
Taanna ilaqqutanilu inissiaqarfimmit allat peqatigalugit politiinit qimagussortinneqarput. Inuit katillugit 13-it qimagussortinneqarput. Debora Aminak politiit qatserisartullu nunap sisoorneranik misissuineranni ilaquttamini najugaqarallarpoq.
Nammineq assilisaq: Debora Aminak, najugaqarfiat taassuma tunuaniippoq.
- Suli angerlarnissatsinnut paasisaqanngilagut, kisianni paasisaqassajunnarsivugut. Kisianniuna sisooqqinnissaa suli ilimagineqartoq.
- Soorunami tupannaqaaq, ujararujussuit nakkarnissaat ersissutigaarput, ilaquttagummi illersorusukkatsigit.
Debora Aminak ilaqutaalu inissiamit qimagussortitsiviusumi qiterlermi najugaqarput.
- Sisoorfiup nalaani ujararujussuaq angisooq tassaniikkami, taassuma nakkariasaarnissaa qununarnermik, taanna oqarpoq.
Inissiaqarfimmi ineqartunik ajoqusertoqanngilaq inissiamullu aseruisimarpasigani.
Nunalli suli sisooqqissinnaanera nalilerneqarmat ineqartut qimagussortinneqarput.
Taamaammat qatserisartut politiit kommunilu suleqatigalugit inissiaqarfik tamaat inuerutissallugu aalajangerpaat.
