Tasiilami nuna sisoortoq: Inissiami najugallit qimagussortinneqartut
Tasiilami nuna ippassaq ataasinngornermi sisoorpoq.
Tasiilami nuna sisoormat aqquserngup Sara Helmsip aqqulaani inissiaq nunap sisoorneranik eqqorneqartoq, politiit ippassaq unnukkut 18:37 kalerrinneqarput.
Kalaallit Nunaanni politiit tusagassiuutinut taama nalunaaruteqarput.
Inunnik ajoqusertoqanngilaq, najugaqarfiillu eqqorneqartut aamma ajoqusinngillat. Nunalli sisooqqissinnaanera ilimanaateqarmat, politiit qatserisartullu suleqatigiillutik najugaqartut qimagussortinneqarnissaat aalajangerneqarpoq.
Najugaqartut eqqissisimasumik qimagussortinneqarput, inissianut allanut ilaallu ilaquttaminnut angerlarallarlutik.
Sisoorfik ullumi marlunngornermi ullaakkut politiinit qatserisartunillu nalilersorneqassaaq.
Tasiilami piffinni allani nunamik sisoortoqarnissaa ilimananngitsoq ilanngullugu nalilerneqarpoq. Nunap sisoorsinnaaneranut aarlerinartoqalissappat politiinut oqarasuaat 701448 imaluunniit qatserisartunut oqarasuaat 598195 attaveqartoqarsinnaavoq.
