Tasiilami meeqqanut isiginnaartitsissusiorput

Otto Ignatiussen aamma Karen Littauer Tasiilami meeqqanut arfinilissaa isiginnaartitsissusiorlutik aallartipput, Tunumi Meeqqat Inuusuttullu isiginnaartitsisartut “Qinngorniit” peqatigalugit.
Allattoq Jaaku Lyberth
juunip 30-at 2008 15:20

Suliaq, illoqarfimmit tamarmit peqataaffigineqartoq, sapaatip akunnerini arfinilinni piareersarneqassaaq, aallartisarlutillu misiliimmata peqataavugut:

Karen Littauer aperaarput susoqarnersoq, akivorlu:

Ottoona illoqarfimmi utoqqaat illuanni pisoqartittuusaarlugu sungiusaasoq. Allanik aamma isiginnaartitsissutiliussaagut, soorlu puisiusuusaassapput, quianartorujussuuvoq, taamaassimammat inersimasut alakkaagamik illartorujussuupput, Karen Littaauer unnersiorpoq, nangipporlu:

-Anguniagaavoq oqaluttuaatitoqqatsitut Kaassassuttut inerneqassasoq, tassa naggataatigut sapinngitsutut misigisimalernissaq, tassami inernera allaanerulaartussaagaluarpoq. Nipilersortartumik taavalu qitinnermut ilinniartitsisumik Sverigimeersumik aamma takkuttoqassaaq, maannakkorpiarlu peqatigaavut tarnip pissusaanik ilisimasalik nipilersortartorlu, aamma perorsaasutut ilinniarsimasoq. Arnaq inuusuttoq kalaaleq nutserisuusussaq sapaatip akunnerata naanerani aamma aallartissaaq. Meeqqat ikinnerpaamik 50-it isiginnaartitsinermi peqataanissaat anguniarparput, massakkorpiarlu aamma imminut tatiginerulernissaq anguniarlugu pikkorissaasoqarpoq, tassani 14-it peqataapput, taakkulu 14-iniit qummut ukioqarput, kisianni aqqaneq-marlunnik ukiulik ataaseq 13-inillu ukiullit marluk pisariaqartitsimmata ilanngutitinnikuuvagut, Karen Littauer oqarpoq.

Karen Littauer aperaarput, Qaanaami suliniutigisimasani pillugu tusagassiutini sammineqarnerujussuusimanera pissutigalugu inunnik aarlerisunik naammattuuisimanersoq, akivorlu:

-Ila tupaallannikooqaanga, tassami aallarteqqinnissara ernummatigilaarsimagakku. Kisianni tassa inuit Ottolu ornittarpaatigut tuitsigullu pattalaarluta, oqartarpullu ajunngitsumik iliuuseqarsimasugut. Allaammi ilaat oqartarput, Qaanaamisuulli maani iliuinnarsinnaasugut, akiinnartarpavulli, Qaanaami Kalaallit Nunaannilu paasititsiniaaginnarsimalluta, kukkuluttornikkullu tamanna aamma Danmarkimut anngussimasoq.

Kisianni angut ataaseq aalakuungaatsiartoq naapippara, kamallunilu assakkut tigorujussuarpaanga, Qaanaaq imigassarlu paasissaarpianngitsumik eqqartungaatsiarpai. Inuit tapersersuisut naapittuaannarpavut, Karen Littauer naggasiivoq.