Tasiilami meeqqanut angerlarsimaffittaassaq akuerineqarpoq

Tasiilami meeqqat angerlarsimaffiannik pilersitsinissamik pilersaarusiaq naalakkersuisunit akuerineqarpoq. Meeqqat angerlarsimaffissaat ateqassaaq Ny prinsesse Margrethes Børnehjem, kalaallisut Prinsesse Margrethep Meeqqanut Angerlarsimaffittaava.

Pilersaarutit taama annertussusillit nalinginnaasumik tamanut ammasumik neqeroorfigitinneqartaraluarput, taamaattoq sanaartugassanik neqerooruteqartitsisarneq pillugu Namminersornerullutik Oqartussat kaajallaasitaanni oktobarip aallaqqaataanni 2000-meersumi allassimavoq neqerooruteqartitsisarnerit saqqummiussineqartaqanngitsumik atorneqarsinnaasut, entreprenøri ataasiinnaq suliamik isumaginninnissamut periarfissaqarpat.

Tasiilami sanaartugassanik suliaqartartoq entreprenør Sørensen og Guldbergsens Efterfølgere meeqqat angerlarsimaffiata sananeqarnissaa isumagisussaavaat.

Meeqqat angerlarsimaffissaanut pilersaarusiassatut siunnersuut ilaqutariinnermut pisortaqarfiup, suliami sanatitsisuusussap, aamma siunnersuisarfiup 2 K-p suleqatigiillutik suliarisimavaat.

Ineqarnermut pisortaqarfiup naliliinera malillugu pilersaarutip tamanut ammasumik suliariumannittussarsiuussineqarnerani pitsaanerusumik akikinnerusumillu angusaqartoqarsinnaasimanngitsoq. Suliassami missingersuutit katillugit 24,2 mio. koruuniupput.