Tasiilami meeqqanik sammisassaqartitsinerit iluatsilluartut
Suliniut maannamut iluatsilluarsimaqaaq, inerneralu ersarippoq - meeqqat angerlarsimaffiup avataanut inissinneqartartut ikileriarsimapput. Taamaattumik meeqqanut sammisassaqartitsinerit ingerlaannarnissaat nuannaarutigeqaara. Suliniut pinaveersaartitsinerorpasippoq, illoqarfimmillu kivitseqataasinnaalluni, meeqqanut, ilaqutariinnut atuarfimmullu ataatsimiisitaliap siulittaasua Poul Hansen oqarpoq.
Aaqqissuussinerit naliginnaasut timersortarfimmi unnukkorsiutitoqatigiinnermik aallartinneqartarput. Tamatuma kingorna meeqqat aalajangertarput timersortarfimmi fritidsklubbimiluunniit sammisaqarusunnerlutik. Timersortarfimmi assigiinngitsunik arsamik pinnguartinneqartarput arpallutillu. Aammali fritidsklubbimi assassorsinnaapput filmerlutilluunniit.
AAMMA ATUARUK Tasiilami inuusuttut kulturikkut illorsuartaalersut
Aaqqissuussineq meeqqat innarniarmata unitsinneqartariaqanngilaq. Angajoqqaat akuersinerisigut paarineqarlutik fritidsklubbimi unnuisinnaapput, aqaguanilu ullaakkorsioriarlutik angerlartarlutik.
Aaqqissuussinerit akissarsiffiup nalaani taamaallaat pisanngillat. Kommuneqarfik Sermersooq ornittakkamik Amarngivat-mik isumaqatigiissuteqarsimavoq. Ornittagaq akissarsiffiup nalaani ulloq unnuarlu ammatinneqartarpoq, sapaatip akunneratalu naanerani sulisoqarluni ammajuaannarluni.
AAMMA ATUARUK Tasiilami timersortarfissuaq meeqqanit ornigarluarneqartoq