Tasiilami kommunip karsia imaarutilerpoq
Tasiilami siorna missingersuutaasunit 8 millioninit amerlanerusunik Inunnik Isumaginninnermut aningaasartuuteqartoqarpoq, ukioq mannalu ikinnerunngimmata, kommunep karsia imaarutilerpoq.
Kilisaat ”Tasiilaq” suliffissaqartitsilluarsimasoq Kitaanut tunineqarsimavoq, kiisalu Imermik nukissiorfiliornikkut sulisut ikinnerusut atorneqalersimapput, KNI-milu atorfiit ilaat Sisimiunut nuunneqarsimapput.
Tassa tamakkua kingunerisaannik Inunnik Isumaginninnermut aningaasartuutit 32,9 millioninut 2006-imi missingersuutaasimagaluartut 40,9 millioni koruunit atorneqarsimapput. Inunnillu Isumaginninnermut aningaasartuutit ukioq manna ikilinngimmata kommunep karsia imaarutilivilluinnarpoq.
Angmassallip kommuneani aningaasaqarnermut pisortaq, Hans Pápe, annilaangavoq, qanoq iliortoqanngippat Qaanaaq perussagamikku, tuppallersaatiginerarpaalli Qaanaamisut akiitsoqartoqannginnamik, imalu nangippoq:
- Taanna qaangerneqassappat kommunalbestyrelse aalajangernikuuvoq Aningaasaqarnermut Inunnillu Isumaginninnermut ataatsimiititaliat ataatsimeeqatigiittariaqartut sukannersumik ingerlatsisoqarnissaa pillugu, taavalu aamma aalajangiipput, immikkut pisisoqassatillugu kommunalbestyrelse arlaannik atortunik aatsaat Aningaasqarnermut ataatsimiititaliamut qinnutigeqqaarlugu pisoqarsinnaammat.
Angmassallip Kommuneani aningaasaqarnermut pisortaq, Hans Pápe, neriuppoq, aalisarnermut piniarnermullu atuarfik kiisalu efterskole Tasiilamut inissinneqarumaartut, taakkua pissarsiarinngikkunikkik aningaasatigut aaqqiinissamut qanoq neriunartoqartiginersoq apeqqutigigatsigu, Hans Pápe ima akivoq:
- Periarfissaarutivissaagut, una aamma eqqarsaatigeriartigu, kommunet kattussuunnissaat aamma taanna qanoq isikkoqassanersoq, kommunep allaffiani taamannak amerlatigiinnassanersut imaluunniit ilanngangaatsiartussaassasut, tassa taakkua suliffissaarunnerit suli socialimut aningaasartuutit qaffannerannik kinguneqassaaq, suliffissanik nutaanik pissarsinianngikkutta ingerlariaqqinnissaq ajornakusuulissaaq Angmassalip kommuneaninngaaniit aningaasat tungaasigut.
