Tasiilami isertitsivimmi atugassarititaasut pitsanngorsarneqassapput

Tasiilami isertitsivimmi pissutsit pitsanngorsarneqarnissaat Danmarkimi politikerit amerlanerit maanna anguniarnialerpaat.
juulip 25-at 2007 05:34

Kalaallit Nunaanni eqqartuussiveqarneq pillugu siunnersuut Folketingip ukiaru oqallisigilerpagu tamanna siunnersuutigineqassaaq.

Isertitsivimmi ineeqqani mikeqisuni inuit sisamat tikillugit sivisuumik isersimatitaasarnerat Dansk Folkepartip De Radikale Venstre-llu atorunnaarsikkusuppaat.

Dansk Folkepartimi inatsisit pillugit oqaaseqartartoq, Peter Skårup, isumaqarpoq, inuit arlallit sivisuumik ineeqqaniitinneqartarnerat akuersaarneqarsinnaanngitsoq.

– Inatsisit atortinneqarfiat danskit akisussaaffigaat. Taamaammat Tunumi isertitsivimmi atugassarititaasut qanoq ilillugit pitsanngorsarneqarnissaat sukumiisumik misissuivigisariaqarparput, Peter Skårup atuagassiamut Kristeligt Dagbladimut oqarpoq.

Peter Skårup isumaqarpoq Tunumi nutaamik isertitsiviliortoqarpat pitsaanerpaassasoq.

Radikalit oqaaseqartartuata, Simon Emil Ammitzbøll-ip,Tasiilami isertitsivinni atugassarititaasut aamma akuersaaruminaatsippai. Tasiilami isertitsiviup allineqarnissaa taassuma siunnersuutigaa.