Tasiilami inuusuttut ilinniagaqalersartut ikippallaarput
Tasiilami atuartut meeqqat atuarfianni 2011-mi 2012-milu naammassisut 140-t akornanni, 40-t efterskolerput pingasuinnaallu GU-mi aallartillutik. Ingerlariaqqittunit ataasinnguamilluunniit, inuussutissarsiornerup iluani tunngaviusumik ilinniakkanut aallartittoqanngilaq. Pissutsit tamakku siunissami attanneqarsinnaanngillat.
Kommuneqarfik Sermersuumi Inuussutissarsiornermut Siunnersuisoqatigiinni siulittaasup, Martin Ben Shalmip misissuinerup inernera ernumanartippaa.
- Ernumanarpoq inuiaqatigiittut ingerlanitsinni, tuiit kivitsisussat nukittorsarneqannginnerat pissutigiinnarlugu inuusuttortatsinnik ikorfartuinnginnerput. Nukiit tamaasa atorfissaqartippavut taamaammallu akisussaaffigivarput, ilinniartitaanermut aaqqissuussaq minnerpaamik iluamik ingerlatissallutigu, Martin Ben Shalmi oqarpoq.
Kommuneqarfik Sermersuumi Inuussutissarsiornermut Siunnersuisoqatigiit aaqqissuussaannik, ilinniarnissamut aallartisarusuttunullu Tasiilami katersuutsitsisoqassaaq sisamanngorpat tallimanngorpallu. Katersuutsitsinermut inuusuttut 225-it maannamut nalunaareersimasut oqaatigineqarpoq.
Katersuutsitsinermi periarfissat suuneri ilinniarnissamullu aqqutiti suuneri ilisimatitsissutigineqassapput. Taamaaliornikkut Kommuneqarfik Sermersuumik neriuutigineqarpoq, Tasiilami inuusuttut siunissarissaarnerulernissaat.
- Kommuneqarfik Sermersuup Inuussutissarsiornermut Siunnersuisooqatigiivinit upperaarput, iluatsiffiit kuiseriarnertut ittartut. Taamaammat aaqqissuussami pingaartipparput, inuusuttut ilinniarnertik pillugu oqaluttuarnissaat - tassanilu suut unammillernartuunersut oqaluttuarineqarnissat pingaartillutigu, Inuussutissarsiornermut Siunnersuisooqatigiit pisortaa, Marie Fleischer oqarpoq.
