Tasiilami inuussutissarsiornermut atatillugu pisortaqannginnera akimmiffiuvoq

Tasiilami inuussutissarsiornermut atatillugu pisortamik ukiuni arlalinni atorfeqartitsisoqanngitsoq taamaattoqarneralu peqqutaalluni Tasiilami inuussutissarsiuteqarneq ineriartunngitsoq Nunatsinni Takornariaqarnermi Inuussutissarsiornermilu Siunnersuisoqatigiit naalisarlugu GTE-mik taaneqartartoq taama tusagassiutinut allappoq.
juunip 14-at 2008 13:51

Sapaatip-akunnera kingulleq Tasiilami politiit pisortaata Krisitian Sinngertaap AG aqqutigalugu naalakkersuisut sakkortuumik uparuarpai Tasiilaq naalakkersuisunit puigorneqarnerarlugu kitaalu kisimi naalakkersuisunit ukkunneqarnerarlugu.

- 2006-mi 2007-milu arlaleriarluta Tasiilami inuussutissarsiornikkut isumasioqatigiitsitsinissamut neqeroortaraluarpugut, Tasiilaamili inussuutissarsiornikkut pisortaqanngimmat kommunip kissaatigaa isumasioqatigiinnissaq kinguartinneqassasoq inuussutissarsiornikkut pisortaqalernissap tungaanut, taama Inuussutissarsiornermut ineriartortitsinermut pisortaq Mads Skifte allakkiamini oqarpoq.

- NTIS 2008-mi april-ip qaammataani Nuummi Nunatsinni inuussutissarsiornikkut pisortanut pikkorissartitsivoq, tassungalu Tasiilaq peqataatitaqarnissaminut aamma aggersarneqarpoq, kommunilli aggertitaqannginnissani qinerpaa. Pikkorissarnermi ilaatigut siunertaavoq inuussutissarsiornikkut pisortat akornanni imminnut atassuteqarluarnerulernissaasa anguneqarnissaat. Inuussutissarsiornikkullu pisortat kommunerujussuaqatissatik issiaqatigaat qanorlu iliuusaasinnaasut inuussutissarsiornikkullu iliuusaasinnaasut oqaluuseralugit, taamatuttaaq siunissami suliarilerumaagassatik akunnerminni agguataarlugit, taama Mads Skifte tusagassiutinut allappoq.

Taassuma aamma erseqqissaatigaa Tasiilami inuussutissarsiornikkut isumasioqatigiinnermik ingerlatsinissamut peqataanissamut piareersimalluni.