Tasiilami inunnik isumaginnittussaaleqisoqarpoq
Tasiilami anaananngortut 20 procentiisa 18-iileqaratik meerartaartarnerat pillugu ikiortariallit ikiorserneqanngitsooratarsinnaanerat juumuujusup ernummatigigaa ullumi tusarparput. Allatulli ajornartumik kommunerujussuanngornermi suli aporfeqartarallassallutik Kommuneqarfik Sermersuumi meeqqanut ilaqutariinnermullu sullissivimmi pisortaq Dora Kleist oqarpoq.
- Nalunngilarput Tasiilaq kommunerujussuanngunngikkallarattali inuttaqarniarnikkut ajornartorsiortoq. Inunnik isumaginninnermut ilinniarsimasoq ataasiinnaavoq aammalu allaffissornikkut ingerlatsinermi tamanut akisussaasuugami suliassalerujussuulluni, Dora Kleist oqarpoq.
Tasiilami atorfiit arfineq-marluk maanna inuttaqannginnerat pillugu suliat sukkanerusumik ingerlanneqarsinnaasanngillat. Pisulli Nuummi eqqumaffigineqarput.
- Nuumminngaanniit inunnik isumaginninnermik ilinniarnikunik qaammammi ataatsimi Tasiilamiititaqassaagut, pisortaq nassuiaavoq.
Kommuneqatigiilersuni Nuummi, Paamiuni, Ivittuuni, Tasiilami Illoqqortoormiunilu sullissinerit sapinngisamik allanngortinnagit ingerlanniarneqarput, ukioq 2009 iluarsaaqqinnernut atussalluni.
- Soorunami aamma nutaajugatta kommuneqatigilikkatsinni pissutsit ilinniaqqaassavagut, oqarpoq.
Taamaalionissaminnilu apeqqutit soorlu: -Sooq-una taama inissisimasoq? Aamma: - Sooq atorfiit inuttaleruminaappat? Akissutissarsiniarneqassapput.
- Iliuuseqarniarluta pissutsit misissoqqaassavagut, Dora Kleist oqarpoq.
Kommuneqarfik Sermersuumi innuttaasunik tamanik sullissineq, pingaartumillu anaananngortunik sullissilluarnissaq anguniarusuppaat.
- Anaananngugaartartut 2006-imili immikkuullarissumik sullillugit allaartinneqarnikuuvuvut. Sulissutigaarput kommunerujussuarmi inoqarfiit tamarmik Nuummisulli innuttaasunut tunniussinnaasat assinginik ingerlatsilerumaartut.
Dora Kleistip ilanngullugu oqaatigaa, illoqarfinni tværfaglig samarbejdsudvalgit - peqqinnissaqarfiup, inunnik isumaginnittoqarfiup atuarfeqarfiup allallu peqatigiillutik suleqatigiiffii maanna ataatsimut Nuummut inissinneqarsimasut, illoqarfinni tamani atuutilerseqqinnissaat sulissutigineqartoq.
Nuummi meeqqanik ilaqutariinnillu sullissivimmi neqeroorutigineqartartut tassaanerupput: ilaqutariinnik siunnersuinerit, meeqqanik oqaloqatiginninnerit, arnanik qimarngusunik ikiorsiinerit aamma naartusunik anaananngortunillu siunnersuinerit.
