Tasiilami inuit aalakkuttut oqallisaasut
Kommunalbestyrelsimut ilaasortap Siumumeersup Laura Taúnajiip imigassanik aalakoornartulinnik nioqquteqarnerup Pisiniarfissuarmit nuunneqarnissaa siunnersuutigaa.
KNI-p pisiniarfissua Pilersuisoq 3.000 m2-it missaannik angitigisoq meeqqeriviup, atuarfiup, multibanep timersortarfissuullu sanianni inissisimavoq. Taamaammat inuit aalakkuttut meeqqanut inuusuttunullu ersarissupilussuupput, Laura Taúnajiip imigassanik aalakoornartulinnik nioqquteqarnerup nuunneqarnissaanik siunnersuutini taama tunngavilersorpaa.
- Inuit ulluni akissarsiffiusuni Pisiniarfissuup silataani aalakkuttarnerat Tasiilami ajornartorsiutaavoq. Meeqqanut maligassiuinerlunneruvoq akuerineqarsinnaananilu, politikeri Siumumeersoq Tasiilamilu najugaqartoq taama erseqqissaavoq.
Taúnajiip siunnersuutaa Kommuneqarfik Sermersuumi marlunngormat ataatsimiittoqarnerani politikerinit tamangajannit oqaaseqarfigineqarpoq.
Kommunalbestyrelsi isumaqatigiissoq
Kommunalbestyrelsimut ilaasortat Tasiilami kikkut tamarmik takusinnaasaannik imigassartortoqartarnerata ajornartorsiutaanera isumaqataaffigaat. Innuttaasulli oqallinnermut peqataatinneqarnissaat apeqqummilu tusarniarneqarnissaat aamma isumaqatigiissutigaat.
Siunnersuut kommunerujussuup aningaasaqarnermut inuussutissarsiornermullu ataatsimiititaliaanut, imigassanik aalakoornartulinnik nioqquteqarnissamut akuersissuteqartarnermik akisussaasumut, ingerlateqqinneqarpoq. Ataatsimiititaliap imigassallerfiusartut, KNI Pilersuisumik piginnittuusoq, kiisalu oqartussat, soorlu politiit peqqinnissaqarfillu, ajornartorsiutaasoq pillugu eqqartueqatiginiarpaat.
Aammattaaq Tasiilami Najukkami ataatsimiititaliaq innuttaasunik ataatsimiititsissaaq, innuttaasut aaqqiissutissatut siunnersuuteqarnissaminnut periarfissinniarlugit.