Tasiilami innuttaasunik ataatsimiisitsineq soqutigineqarluarpoq. Innuttaasummi 250-it peqataasimapput.Assi: Ole Jens Lundblad

Tasiilami innuttaasunik ataatsimiititsineq: Imigassarsisinnaaneq 21-nik ukiulinnut killilerneqarusuppoq

Tasiilami innuttaasut nammineq aalajangiisinnaasuuppata inuusuttut 21-it ataallugit ukiullit imigassanik aalakoornartortalinnik pisiniaqqusaajunnaassangaluarput.

Tasiilami nunaqarfiinilu tallimani septembarip aallartilaarnerani imigassamik aalakoornartortalinnik pisiniartoqarsinnaanera sapaatip akunnerini marlunni matuneqarpoq, tamanna pivoq isumaginninnermi ajornartorsiuterpassuit imaannaanngitsut aningaasarsinerup aamma akileraarutinik utertoornerup kingorna  illoqarfimmi nalaanneqareersullu.

Tasiilamimi peqqinnissaqarfimmut imigassamik aalakoornartutalimmik peqquteqartumik unitsitsinneqartut saaffiginnittullu imaaginnavipput, allaat napparsimmavik malinnaasinnaajunnaarluni.

Tasiilamilu innutaasut ilaasa inuttut atukkaminnik ajornartorsiuteqarnerujussuisa qanoq qaangerneqarsinnaanerata oqalligisigineqarnissaa pisariaqartinneqarpoq.

AAMMA ATUARUK Tasiilami imigassamik inerteqquteqaqqusisoq: Allamik imminut toquttoqarnissaa ernumassutigigatsigu

Taamaattumik Tasiilami najukkami ataatsimiititaliap aaqqissugaanik innuttaasunik marlunngornermi unnukkut ataatsimiisitsisoqarpoq. 

Ataatsimiititsinerlu innuttaasunit soqutigineqarluarpoq, innuttaasummi 250-it ataatsimiigiaqataapput.

Taama oqaluttuarpoq Kommuneqarfik Sermersuup Tunumi immikkoortortaqarfiani pisortaq, Hjørdis Viberg.

- Naatsorsuutigisatsinnit amerlanerupput. Aamma oqaatigisariaqarpara illoqarfiup ataatsimoorsinnaaneq nukittuffigimmagu. Illoqarfimmimi maani ataatsimoorussaqarsinnaaneq nuannerineqartarpoq. Tassa illoqarfiup nukittoqutaasa ilagilluinnarpaat, Hjørdis Viberg oqaluttuarpoq.

- Pitsaaqutaasullu ilagivaat inuiaqatigiinni sumi tamani inissisimasut najuummata. Aamma ukiumikkut. Inuusuttunit ukioqqortunerulaanut. 

Innuttaasunik ataatsimiititsinermi qulequttat sisamat eqqartorneqartut:

  • Nammineq piumassutsimik iliuuseqartarnerit
  • Imigassartorsimanerup malitsigisartagai ajortut
  • Meeqqanut isiginnittarnerit
  • Inissiat, suliffissat aamma ilinniarnerit

Erngerluni iliuuseqartoqalerpoq

Hjørdis Vibergip oqaluttuarivaa aaqqissuisut qulequttat sisamat eqqartortinniarlugit toqqarsimagaat.

Ataatsimiigiallu tamarmik sammineqartussanut soqutigisaqarfigisaminnut aamma arlaatigut iliuuseqaqataaffigisinnaasutut misigisimaffigisaminnut oqalliseqataaniarlutik ilanngussimapput.

Taamaaliornerlu erngerluni iliuuseqarfigineqartussanik marlunnik inerneqarsimavoq.

- Eqqartorneqarpoq nunaqqatigiittut imminut paarinissaq kissaatigineqartoq. Innuttaasut aningaasarsiffissat annerit sioqqullugit tallimanngornerni aalakoornartortalinnik imigassartaqanngitsumik aaqqissuisoqartarnissaanut kissaateqarput, Hjørdis Viberg oqaluttuarpoq. 

Kissaatigineqartorlu tamanna Hjørdis Vibergip oqarnera naapertorlugu kommunip sunngiffimmi immikkoortortaqarfianit taperserneqarsimavoq.

- Taamaalilluni isumaqatigiissutigineqarpoq siunissami taamaaliortoqartalissasoq, oqarpoq.

Tamatuma saniatigut aamma qaammammut ataasiarluni aalajangersimasunik qulequtsiilluni ataatsimiittoqartalissaaq, tamannami innuttaasut aamma kissaatigisimavaat.

- Tamannalu aaqqissuuttalerumaarlutigu neriorsuutigivarput, Hjørdis Viberg oqarpoq.

Iliuuserineqartussatut kissaatigineqartut

Taakkua saniatigut innuttaasunik ataatsimiititsinermi peqataasut Tasiilami inuuniarnikkut ajornartorsiutit sakkortuut qaangerniarnissaannut iliuuserineqarsinnaasunik kissaateqarsimapput.
 
- Angajoqqaat naapiffigisarsinnaasaannik illoqarfimmi peqarnissaa kissaatigineqarpoq. Tassani angajoqqaat ulluni nutaaliaasuni angajoqqaajunermi ilungersuutigineqarsinnaasartut oqaloqatigiissutigisarsinnaagaat kissaatigineqarpoq. Aamma Tasiilamit aallaaveqartumik pisariaqartitsinermi oqarasuaatikkut sianerfigineqarsinnaasumik pilersitsisoqarnissaa kissaatigineqarpoq. Taassumalu pilersinneqarnissaa aamma sulissutigisussanngorparput, Hjørdis Viberg oqarpoq.

AAMMA ATUARUK Tasiilami najukkami ataatsimiititaliap aaqqissugaanik innuttaasunik ataatsimiisitsisoqassaaq

- Inerteqqutit kissaatigineqanngillat. Taarsiullugu neqeroorutit kissaatigineqarput. Inerteqqutimmi ineriartortitsisanngillat. Atorunnaarsitsiartortarpummi, oqarpoq.

21-nik ukiulinnut killiliisoqarusuttoq

Aamma innuttaasunik ataatsimiititsinermi peqataasut aalajangiisinnaasuuppata, taava imigassanik aalakoornartortalinnik pisisinnaatitaasut ukiui 18-iniit 21-nut Tasiilami qaffanneqassangaluarput.

- Imigassanik aalakoornartortalinnik pisisinnaasut ukiuisa 21-nut qaffanneqarnissaat innuttaasut kissaatigivaat, Hjørdis Viberg oqarpoq.

- Innuttaasut aamma kissaatigivaat imigassat aalakoornartortallit immikkoortilerlugit pisiniarfinnut allanut nuunneqassasut, taamaalilluni ulluinnarni niuertarfinni nioqqutaajunnaartillugit, oqarpoq. 

Taakkua saniatigut innuttaasut kissaateqarsimapput Tasiilami katsorsaaveqalernissaanut. Katsorsaavik innuttaasut imigassamik ajornartorsiuteqarnernut imaluunniit innuttut aqqusaarsimasat sakkortuut suliarinissaanut katsorsaavigisinnaasaat. Tassa katsorsaavik innuttaasunit inuttut atukkaminnik ajornartorsiuteqartunit saaffigineqarsinnaasoq oqaloqateqarfiusinnaasorlu.

AAMMA ATUARUK Tasiilami inissaaleqineq neriuuteqannginnerlu unammillernartut

- Kissaatigineqartoq annertooq tassaavoq maani illoqarfimmi katsorsaavik, maanngaanniit aallaaveqartoq pilersinneqassasoq, Hjørdis Viberg oqarpoq.

Tasiilamimi innuttaasut imigassamik ajornartorsiuteqarlutik imaluunniit inuttut aqqusaarsimasaminnik sakkortuunik suliaqarniarlutik katsorsartinnissaminnut, Hjørdis Vibergip oqarnera naapertorlugu qaammaterpassuarni utaqqisinnaasarput.

- Aallartinnissarnut qaammatini marlunnit ukiup affaata tungaanut utaqqisinnaasariaqartarputit.

Tasiilami najukkami ataatsimiititaliap Kommuneqarfik Sermersooq suleqatigalugu aalajangersimavaa innuttaasunik ataatsimiisitsinerup inerneri quppersaganngorlugit saqqummersinniarlugit. Taakkualu illunut tamanut agguaanneqarumaarput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl