Tasiilami imminut toqunniarlutik sioorasaarisut arlallit
Sapaatip akunnerat naanerinnaani Tasiilami imminut toqunniarlutik sioorasaarisut tallimat politiinut nalunaarutigineqarput politiillu ulapaangaatsiarsimapput.
- Qujanartumik napparsimmavik suleqatigilluarparput pisariaqartillugulu imminut toqunnissamik sioorasaarisunik unitsitsisarput nakkutigalugillu, Tasiilami politeeq Hans Poul Andersen oqarpoq.
Inuit marluk imminut toqunniarlutik sioorasaarisut sapaatip akunnerata naanerani napparsimmavimmut unitsinneqarsimapput. Imminut toqunnissamik eqqarsaateqartut aamma ikiortissarsiorsinnaapput oqaraasuaatikkut saaffiginnittarfik 146 atorlugu. Taanna ataasinngornikkut pingasunngornikkullu nal. 19-miit 22-mut saaffigineqarsinnaavoq.
Sapaatip akunnerata naanerani ernguttoqangaatsiarsimavoq angerlarsimaffinni eqqissiviilliortoqarluni aqqusinermilu nakuusertoqartarluni.
Tasiilami politiit aamma kalerrinneqarsimapput sikorsuit tiperiasaarmata piniartut arlallit assertillutik angerlamut apuunnaveersimasut. Umiatsiaaqqat qulit assertissimapput.
- Puttaarsinnarlutik nunakkut pisullutik angerlamut apuussinnaasimagaluarput taamaasiussagunilli piniutitik annaasussaagamikkit umiatsiaaqqaniiginnarsimallutik, Hans Poul Andersen oqarpoq.
