Tasiilami ilinniartut najugaqarfissaat sananeqalerpoq

Tasiilami ilinniartut inissaanik sanaartortoqartussanngorpoq. Inatsisartut naalakkersuisullu ilinniartut najugaqarfissaata sanaartorneqarnissaanut 14 millioner koruuninik aningaasaliipput Tasiilallu peqqissaaviani pilattaasarfiup nutaarterneqarnisaanut allilerneqarnissaanullu 5,4 millioner koruunik aningaasaliinissaminnut akuersillutik.

Tasiilami sanaartorneqartussatutut aningaasaliiffigineqartut suliffeqarfimmut ataatsimut suliariumannittussarsiuunneqaqqaaratik sanaartorneqartussanngorput.

Suliffeqarfik S & G East Coast Contractors Tasiilami ilinniartut ineqarfissaannik peqqissaviullu pilattaavianik sanaartortussatutut akuerineqartut, sanaartugassaasa pisariinnerat annertuujunnginnerilu pissutigalugit nalinginnaasumik suliariumannittussarsiuussisarnissamik aalajangersakkat malinneqanngitsut, sanaartornermut naalakkersuisoq Kim Kielsen naliliisimavoq. Kim Kielsen isumaqarpoq, suliffeqarfiup S aamma G East Coast Contractors-ip suliassap tamanut ammasumik suliariumannittussarsiuunneqarneratigut pitsaanerusumik akikinnerusumilluunniit angusaqartoqarsinnaanissaa atorfilittannit qularnartoqartinneqarmat,pisortaqarfiup suliariumannittuussisarnerup maleruagassai immikkut ittumik aalajangersagaq atorlugu tamanut ammasumik suliariumannittuussineq atorneqarsimanngitsoq.

Sulisitsisut Peqatigiiffiata Grønlands Arbejdsgiverforening-ip pisortaa Ole Rud, radioaviisimut oqarpoq, sanaartornermut pisortaqarfiup suliariumannittuussarsiuussinermut maleruagassaq avaqqummagu eqquumigaalugu, sulisitsisulli peqatigiiffiani ilaasortat allat aalajangiisimanermut naammagittaalliunngippata, sulisitsisut peqatigiiffiat sanaartornermut pisortaqarfiup aalajangersimanera akuleruffiginiarnagu.