Tasiilami ilinniagaqalerumasut amerlassutsimikkut rekordiliipput
- Tassa siornamut naleqqiullugit qinnuteqartut 33-nik amerlanerupput, Tasiilami Piareersarfimmit Erik Angenold ilinnialerumasut pillugit oqaaseqarpoq. Qinnuteqaatit amerlagaluartut ilinniagaqalernissamik tamarmik kinguneqarnavianngillat. Tassami GU-mi ilinniarfinnilu allani ilinnialersussatut tiguneqarsinnaasut killeqarput.
-Siorna qinnuteqaatit 184-it tiguagut, taakkunanngalu 30-iinnat ilinniarfissarsipput, Erik Angenold oqarpoq. Tamannalu Tasiilami sungiusaatigalugu suliffissaaleqinermik patsiseqarpoq, inuusuttuaqqallu amerlasuut meeqqat atuarfiat naammassigaangamikku suliffissaaleqilersarput, naak ilinniagaqalernissartik kissaatigisaraluaraat.
- Massakkuugallartoq ilinniagaqalerumasut 20-it Tasiilami sungiusaatigalugu suliffissarsereerput, ilinnialerumasullu allat illoqarfinnut allanut sungiusaatigalugu suliartortissinnaavagut kiisalu kitaani brancheskolenut allanut aallartissinnaavagut, taakkunanili tiguneqarsinnaasut aamma killeqarput.
Ilinniagaqarumallutik qinnuteqartut allanik periarfissarsiuukkumallugit maanna misissuisoqartoq, Piareersarfimmit erseqqissaatigineqarpoq.