Tasiilami ikuallannersuaq
Tasiilami umiatsiat nuannaariartaatit aqqaneq-marluk tallimanngornerup unnuaani nunguillutik ikuallassimapput.
Tasiilap politiivini politiassistenti Bo Edwardsen taama ilisimatitsivoq.
Angut 30-t sinnerlugit ukiulik ikuallatsitsisimasutut unnerluutigineqartussanngorpoq.
Angut aalakoortilluni umiatsiat ilaanni sininniarluni ikisimavoq, kissarsuullu petroleumitortoq ikissimallugu.
Pujulermat angut itersimavoq angallammiillu qimaasimalluni.
Aqqanermut tanneq qulingiluanngortoq angallat ikuallalersimavoq, tassaanngaanniillu angallatinut allanut siaruaassimalluni.
Angallatit ikuallattut qatserisartunit qaminniarneqarsimagaluarput, imassalli qaaralersimammata innermik qamitsiniarneq ajornakusoorsimalluni.
Tamanna pissutigalugu angallatit ikuallattut imaanut avalatsiinnarneqarsimapput, ikuallatsiinnarneqarsimallutillu.
Akunnerit pingasungajaat angallatit ikuallassimapput.
Ikuallannermi inunnik ajoqusertoqanngilaq.
