Tasiilami borgmesterip kommuninut allanut kattussinnaalernertik iluarisimaarpaa
Kommunit siunissami kattunnissaminnut periarfissaat Aaqqissuussaanermut Isumalioqatigiissitaliap ataatsimiinnerminni kingullermi amerlivaat. Tasiilami borgmesterip kommuninut allanut kattussinnaalernertik iluarisimaarpaa.
-Taakku saqqummiussaat kingulliit siullerminngaaniit uagutsinnut naammaginarnerupput, pituttorneqanngiivilluta periarfissinneqaratta. August-ip 15-ianinngaanniit kommunalbestyrelsi ataatsimiilerpat punkt-inngorlugu aatsaat nalilersussavarput, kommunit ataatsimut kattunnissaat qanoq isumaqarfigineripput, Vittus Mikaelsen oqarpoq.
Aaqqissuussaanermut Isumalioqatigiissitap kommunit kattunnissaannik siullermik saqqummiussaanni, tunumi kommunit qeqqani kommuninut kattunnissaat siunnersuutigaat. Tamannali kommuninit amerlanernit orniginartinneqanngilaq.
Nuuk kattusseqatigissallugu orniginartinneqarpoq.
-Uagut arlaannaalluunniit taakku illoqarfiit takuneq ajorpagut. Iluarsaaqqinnermi kommunit aallaavigivaat kommunit immikkut qanittut ataatsimoorussamik innuttaasunut sullissiveqalernissaat anguniarneqassasoq, allaffissornerujussuaq 800 millioni koruninik ukiumut atortakkat millisinniarlugit. Kisianni Ammassallip kommunia arlaannaannulluunniit qanigisaqanngilaq, Vittus Mikaelsen oqarpoq.
Kulturip kitaanut naleqqiullugu allaanerujussua Vittus Mikaelsen-ip ilanngullugu eqqaavaa, taamaammallu arlaannaalluunniit pingaarnerutinnagu.
-Ulluinnarni ineriartornerput eqqarsaatigalugu 1900-kkunninngaanniit ullumikkumut, uanga nammineq malugivara kommuni qaninnerusarput tassaasoq Nuup kommunia. Pissutigalugu maanngaanniit angallattut tamatigorluinnaq Nuuk aqqusaaqqaartaramikku, inuillu amerlanerpaartaat avataanut feriassagaangamik aamma Nuummut feriartarlutik ilaqutarpassuaqaramik. Taamaattumik uanga nammineq malugisarpara Nuuk qaninnerpaatut isigalugu kalaallit nunatsinni kommuninit allaninngarnit, Vittus Mikaelsen oqarpoq.
