Tasiilami angallatit ikuallattut sillimmasersimapput
Tasiilami umiatsiat katillugit aqqaneq-marluk tallimanngormat unnukkut ikuallannermik eqqorneqarput.
Angallatinik piginnittut amerlanerpaartaat sillimasiisimasut, Tasiilami politeeq Bo Edwardsen oqarpoq.
- Tanmanna assut qujanarpoq, ikuallannermik eqqugaasuni aqqaneq-marluusunit, afineq-pingasut angallatiminnik sillimmasiisimapput, ajoraluartumilli piniartoq ataaseq angallatiminik sillimmasiisimanngilaq, taannalu ajornartorsiulerpoq.
Angut imersimatilluni tallimanngormat unnukkut angallatit ilaanni sininniartilluni, kiassaat petroliutortoq ikissimavaa, tamatumalu kingunerisaanik angallammi ikuallattuulerneq aallartissimavoq, angallatinullu allanut siaruartilersimalluni. Angut pineqartoq ikuallatsitsilluni unioqqutitsisimasutut pisuutinneqartussanngorpoq, angallatinillu aserorsimasunik taarsiisussanngortinneqarsinnaasoq Tasiilami politeeq Bo Edwardsen oqarpoq.
Piniartup sillimasersimannginni pissutigalugu annaasaqarnera, KNAPK-mit qanoq iliuuseqarfigineqarniarnersoq apeqqutigaarput, KNAPK-mi siunnersuisutut atorfilik Klaus Gedionsen oqarpoq, ilaasortat angallatiminnik sillimmasiisarnissaasa pingaaruteqarnera oqariartuutigalugu erseqqissartuartaritsik. Piniartoq angallammik annaasaqartoq, KNAPK-mut saaffiginnissagaluarpat, ikiorneqarnissaanut aqqutissiuunneqarumaartoq, Klaus Gedionsen oqarpoq.
Angallammik sillimmasisarnermi ukiumut akiliutaasartuni akikinnerpaaq 5000 koruuningajannik akeqarsinnaasoq, Kalaallit forsikring ilisimatitsivoq.
