Taseralik aamma AllStars finalerfiussaaq

Fiilmertarfik atorneqassatillugu Cafè Taseralimmi imaluunniit ataatsimeersuartarfimmi AllStars fjernsynikkut isiginnaarneqartarpoq fiilmertarfillu atorneqassatinnagu nippaallugu tassani isiginnaarneqartarluni.

Isiginnaaqatigiinnermi nuannequtaasut amerlaqaat: Qullililaartarnerit, illartarnerit, nilliasarnerit, perusisarnerit, pissangaqatigiinneq minnerunngitsumillu nuannaaqatigiinneq.

Nuannersumik aamma unammilaanngitsoortoqanngilaq, tassami Taseraliup pisortaata Nina, Julie AllStarsimi erinarsortoq, ukuarimmagu nipilersornermilu ilinniarfimmi pisortaasup Aalborgimeersullu Niarn AllStarsimi erinarsortut ilaat qatanngutigimmagu. Taamaattumik Julie AllStars ingerlaqqissimanngitsuuppat isumaqatigiissutaasimavoq Niarn AllStars-ip ingerlanera tamaat aamma Taseralimmi malinnaavigineqassasoq. Qujanartumilli tassa tamarmik finalimut anngupput tallimanngorpallu pissanganarumaarpoq kikkut ajugaajumaarnersut.

Aallakaatitassiami immikkoortortaq siulleq naappat taasinissap tungaanut Cafè Taseralimmi perorsaasunngorniarlutik ilinniartut guitarilerlutik erinarsoqattaarniarput, taamalu pissanganeq utaqqinerlu sivikillisarlugu. Aamma iganissaminnut periarfissaqanngitsut, nuannaarnermilluunniit igajartorusunngitsut periarfissaqarput Cafè Taseralimmi nerinissaminnik, ulloq taanna tikaagulliup neqaa sakkortulaartunik akoorlugu qaqorteqqasulerlugulu sassaalliutigineqassammat.

- Tamassi AllStars-erluarnissassinnik kissaappatsigit!, Taseraliup pisortaa Arnajaraq Støvbæk kaammattuivoq.