Taseq Nalunnguarfik immangaatsiarpoq

Sisimiuni taseq Nalunnguarfik weekendimi immariataarmat, qimussersut qamuteralattullu ajutoorput, qimmip ataatsip toquneranik kinguneqartumik.

Nalunnguarfik februaarip qaammataani sikuulluinnartaraluarpoq angallaffigineqartarlunilu.

Sapaatiummalli taseq 60 – 80 centimeterit missaanni immappoq.

Sisimiuni Nukissiorfiup pisortaata Jan Zachariassenip tamanna nassuiaruminaatsippaa.

- Tatsip Nilliasup tatsimut Nalunnguarfimmut kuunnera taama ingasatsigineq ajoraluarpoq. Ilimagaarput sapaatiummat sermeq miligutaasoq kaanngarsimassasoq, Nalunnguarfimmillu immatsitsingaatsiarluni. Taamaattarnera nalinginnaasaraluarpoq, kisianni taamarsuaq ingasatsigineq ajorluni, Sisimiuni Nukissiorfimmi ingerlatsinermut pisortaq Jan Zachariassen nassuiaavoq.

Taanna aperaarput, februaarip qaammataani Nalunnguarfiup Tasia meeterip affaanik immattoq siornatigut misigineqartarsimanersoq.

- Naamik aatsaat taamatut pisoqarpoq, siornatigut imeq Nilliasumit Nalunnguarfimmut kuuttoq arriitsunnguamik kuuttaraluarpoq, tassaanngannarsuaq pinani. Tassanngaannarlu sermip kaanngariataarnera immannermut peqqutaarpiarpoq, Jan Zachariassen oqarpoq, nangipporlu:

- Suliffeqarfinnut annernut pilersuineq allanngunngikkaluarpoq, silaannarli ukiut kingulliit sisamat kiatsikkiartorpoq, imaassinnaavorlu tamanna aamma peqqutaaqataasimasinnaasoq, oqarpoq.

Sisimiuni suliffíssuaq imilersorniarlugu, tatsimit allamiit imermik pumpeeraluni pilersuisoqartarpoq. Jan Zachariassenilu aperaarput, sikup kaanngarneratigut imeq tassanngaannaq kuulermat imermik pumperaluni pilersuineq unitsiinnarsimasinnaannginneraat.

- Taamaaliorsimasinnaagaluarpugummi, kisianni siunissaq ungasinnerulaartoq eqqarsaatigalugu iliuuseqartariaqarsimavugut, tassami upernaaq tikillugu illoqarfik tunisassiorfillu imermik pilersorneqartariaqarput, Jan Zachariassen oqarpoq.

Taanna erseqqissaavoq, illoqarfik imeqartuassappat, Nalunnguarfiup ernga immakkaluartoq allatut iliorsinnaasimanatik.

Sisimiuni politiit Sisimiullu kommunia Nalunnguarfiup nalinginnaq angallaffiunissaanut mianersoqqusipput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl