Tartupaluup aaqqiagiinngissutaanera iluarsiiviginialerpaat

Tartupaluk pillugu aaqqiagiinnginneq iluarsisariaqalerlugu Canadap Danmarkillu isumaqatigiissutigaat. Tamanna statsministerip Anders Fogh Rasmussenip naalakkersuisut siulittaasuannik Hans Enoksenimik naalagaaffeqatigiinnerup iluani pissutsinik eqqartueqateqareerluni ullumi uppernarsarpaa.

- Qeqertaq taanna Kalaallit Nunaannut atasoq danskit tungaannit erseqqilluinnartumik nalunaarutigaarput. Tamanna erseqqilluinnartumik oqaluttuarisaanikkut, nunap sananeqataatigut inissisimaneratigullu Kalaallit Nunaannut atanera tunngavilersorsinnaavarput. Statsministeri oqarpoq, imalu nangippoq:

- Danmarkip qangarsuaaniilli Canadamiut Tartupalummik soqutigisaqanngikkallarmatali Kalaallit Nunaannut atasutut isigaa.

Canadamiut, Nunatta Danmarkillu aallartitai FN-ip ataatsimeersuarnerani isumaqatiginninniarlutik qaammatip tulliani aallartinnissaat ilimagineqarpoq.

Isumaqatiginninniarnermi isumaqatigiittoqassanngikkaluarpat arlaannaanulluunniit atanngitsumik nunani tamalaani isumaqatiginninniartitsisoqarnissaq ilimagineqarsinnaasoq Anders Fogh Rasmussenip erseqqissaatigaa.