Tartupalummut aallartitsisoqarpoq

Kangilinnguani sakkutooqarfiup umiarsuaaraq alapernaarsuut Tulugaq qeqertamut assortuussutaaqisumut Hansip Qeqertaanut, avanersuarmiutoorlugu Tartupalummut aallartippaa.

- Alapernaarsuineq danskillu oqartussaaffiinik erseqqissaanissaq sakkutooqarfiup pingaarnertut suliassaraa, tamannalu siunertaralugu Hansip Qeqertaaliartitsisoqarpoq. Sakkutuut umiartortut naalagaat Alex Jensen oqarpoq.

Alex Jensenip erseqqissaatigaa, Hansip Qeqertaata tungaanut ukiut tamaasa angalanissamut pilersaarusiortoqartartoq, taamaattumillu maanna aallartitsineq tupinnartortaqanngitsoq.

- Aamma aqqutaani aalisariutinik nakkutilliinissaq pilersaarutaavoq, pisariaqartitsisoqassagaluarpallu annaassiniaqataasoqarsinnaassalluni. Tassa imaappoq, suliassat nalinginnaalluinnartut ingerlanneqassammata. Alex Jensen nassuiaavoq.

Hansip Qeqertaa tikikkuminaatsumiippoq, ilaatigut sikorsuaqartarnera pissutaalluni. Qeqertaq 1988-imiilli ulloq manna tikillugu pingasoriaannaq danskinit tikinneqarsimavoq.

- Ileqqoraarput erfalasuliisarnerput, erfalasoq kingullermik ikkunneqarsimasoq nalinginnaasumik tingitaasimasarmat. Aamma peqqumaasiisarpugut, inussummilu nalunaarusiortarfimmi allattarluta. Tamakku naammasseriarlugit iluatsitsissagutta suli avannarpasinnerusumut angalasinnaasarpugut. Alex Jensen oqarpoq.

Hansip Qeqertaani nalinginnaasumik imigassamik soorlu Cognac-imik imaluunnit Gammel Danskimik qimatsisoqartarpoq, maannalu aamma taamaaliortoqarnissaa ilimagineqarpoq.

- Imaassinnaavoq imigassamik Canadameersumik peqartoq, taassumali peernissaa ilimananngilaq. Kisianni imaassinnaavoq Canadamiunik ilassinninnermut atorneqartoq. Alex Jensen oqarpoq.

Hansip Qeqertaata maanna tikikkuminarnissaa ilimagineqanngilaq, aatsaalli sapaatip-akunneri pingasut missaanni qaangiuppata tikinneqassagunarmat sikuersimanissaa neriuutigineqarpoq.

- Aggusti tamaat avannaarsuaniisitsinissaq naatsorsuutigineqarpoq. Sakkutuut umiartortut naalagaat Alex Jensen oqarpoq.

Canadap Illersornissamut ministeria Danmark ilisimateqqaarnagu Hansip Qeqertaaniititseqqammerpoq. Tamanna Danmarkimit akerlilerneqarpoq, danskillu sakkutooqarfiannit maanna aallartitsisoqarpoq, qeqertaq canadamiunit pigineqannginnera takutinniarlugu.