Tartupalummik pilerngunneq taamaatikkallarpoq

Tartupalummik pilerngunneq taamaatikkallarpoq. BT ullumi allappoq Danmark, nunarput Canadallu isumaqatigiissutigisimagaat akerleriinneq isumaqatigiinninniarnikkut iluarsiniarlugu.

-Canada-miut isumaqatigiissuteqarfigaagut pisoq naammassiniarlugu. Taamaammat misissuinerit aallartilerpagut, nunanut allanut ministeri Per Stig Møller oqarpoq.

Qeqertamut 1,3 kvadratkilometerisut angitigisumut pilerngunneq taamaatissaaq, Per Stig Møller-ip Canadamilu nunanut allanut ministeri-ip New York-mi ukiamut septemberimi naapinneranni.

Danmark-ip, nunarput Canada-llu aaqqiagiinninneq iluarsisinnaanngikkunikku isumaqatigiipput, nunat tamat akornanni eqqartuussivimmut Haag-imiittumut Tartupalummik piginnittussaaneq nalilersinniarlugu.

Canadap illersornissamut ministeria Bill Graham sapaatit akunnialui qaangiummata qeqertaq tikeraarpaa, Canadallu erfalusua ikkullugu. Tamannalu Danmarkimit akerlerineqangaatsiarpoq.

Per Stig Møller-ip qularutiginngilaa, Tartupaluup inissisimanera oqaluttuassartaalu misissorneqareerpata isumaqatiginninniarnerit Haag-imiluunniit eqqartuussiviup nalilerumaaraa qeqertaq nunatsinnut atasuusoq.