Tartupalummik Canada piginnittuuvoq, Pierre Pettigrew oqarpoq
Tartupalummik piginnittuulluni Canada uppernarsaatissaqarluarpoq, Canadami nunanut allanut ministeri, Pierre Pettigrew taama oqarpoq. Tamannalu danskit nunanut allanut ministeriannut Per Stig Møllerimut qaammatip tulliani New Yorkimi ataatsimeeqateqaleruni nassuiaateqarfiginiarpaa.
Danmark Nunarpullu Tartupalummik piginnittuusinnaatitaanerminnut piumasaqarsinnaanngitsut canadamiut tusagassiorfiinut arlalinnut Pettigrew nalunaaruteqarpoq. Oqaluttuarisaanermi nunallu assigiinngitsut inatsisaannik malittarisassat imminnut naleqquttut tunngavigalugit Tartupalummik Canada piginnittuuvoq. Taamaakkaluartorli nunat akornanni eqqartuussiviup nuna sorleq piginnittuunersoq aalajagissagaa ilimagalugu Pierre Pettigrew nalunaaruteqarpoq.
- Tartupalummik piginnittuunerput tunngavissaqarluarpoq, taama oqarpoq.
Pettigrew-ip innersuussutigaa Tartupaluk 1,3 kvadratkilometerisut angitigisoq tulunnit nassaarineqaqqaarsimasoq taamanikkumiilli canadamut atalersimalluni. Nunap assingini tamanna allattorneqarsimavoq Tartupalullu canadamiut ilisimatuuisa 1940-kkunni sivikitsumik najorlugu ilisimatusarfigisimagaat, aviisimut Globe and Mail-imut nalunaarutigaa.
Canadalli ukiorpassuarni Tartupalummik soqutigisaqannginnerata kingunerisaanik canadami naalakkersuisut tunngavilersuutai ajoquserneqarput.
Halifaximi Dalhousiep University-tiani nunat assigiinngitsut inatsisaannik malittarisassat pillugit ilisimasalik Hugh Kindred isumaqarpoq Canada ersarilluinnartumik Tartupalummik piginnittuulluni uppernarsaatissaqanngitsoq.
Naak tuluit Tartupalummik nassaaqqaartuusimagaluartut canadamiullu kingornussisimagaluartut, piginnittuuneq illuatungeriit qeqertamiittarnerata sivissussaanik tunngaveqarluni aalajangiiffigineqartussaavoq, taama nunat assigiinngitsut inatsisaannik malittarisassat pillugit ilisimasalik erseqqissaavoq.
- Taamaalilluni apeqqutaalerpoq oqaluttuarisaanermi Canadap Danmarkillu qanoq Tartupaluk ukiut ingerlanerini atortarsimaneraat, Hugh Kindred taama oqarpoq.
