Tartupaluk tikinngiluatsiaannarpaat
- Apuutiliivikkaluarlutali sikoqarpallaarnera pissutigalugu tinupattammit qaarsooqisumit sømilinik qulinik avasitsigisumi uniinnartariaqarpugut, ilisimasassarsiortut pisortaat, kommandøri soraarneq, Kangilinnguanilu pisortaasimasoq, Axel Fiedler, nutaarsiassaqartitsivimmit Ritzauimit taama issuarneqarpoq.
Tartupaluk Canadamit Danmarkimillu pernaanneqarpoq. Qaammataasakkut 2007-imi assilisatigut paasineqarpoq, canadamiut oqartarnerattuut killeqarfik Tartupaluk kangeqqunnagu qeqqatigoorpoq - tamannalu canadamiut nassuerutigaat.Tartupalummi annertuumik uuliaqarlunilu, gasseqarlunilu aatsitassaqarluarnissaa ilimagineqarpoq. Isumaqatigiinnginneq 2005-imi aasakkut aallartippoq, Canada Danmarkilu Tartupaluk pillugu arlaleriarlutik ataatsimeeqatigiittarput.Qeqertaq 1,3 kvadratkilometerimik angissusilik pillugu Danmarkimi nunanut allanut ministeri, Per Stig Møller, aamma Canadami nunanut allanut ministeri, Lawrence Cannon, apriilip aallaqqaataanni kingullermik ataatsimiipput. Tassanili ataatsimiinnermi aamma isumaqatigiissuteqartoqanngikkallarpoq.
