Tartupaluk suli isumaqatigiinngissutaavoq
Qeqertaq Kalaallit Nunaata Canada-llu akornanniittoq Tartupaluk suli assortuussutaavoq. Killeqarfiup qeqqani uuliamik gas-imillu nassaartoqarpat uulia gas-ilu nunamit sorlermit oqartussaaffigineqasssanersut suli erseqqissumik aalajangiiffigineqanngilaq.
Kalaallit Nunaata Canadallu akornanni killeqarfik pillugu isumaqatigiissut ippassaq unnukkut naammassineqarpoq, danskit nunanut allanut tunngasunut ministeriat Villy Søvndal Canadami nunanut allanut tunngasunut ministerimik John Baird-imik Ottawa-mi ataatsimeeqateqarnerata kingorna.
Killeqarfik isumaqatigiissummi pineqartoq 3.000 kilometer-isut isortartutigivoq. Taanna Kalaallit Nunaata kujataanit avannamut Davis Stræde aamma Baffin-ip kangerliumarngata imartaa aqqusaarlugu qalasersuup tungaanut isortartugivoq.
Killeqarfik pillugu isumaqatigiissut nutaaq 1973-mi isumaqatigiissutaagallartoq taarserlugu nutaamik maanna isumaqatigiissuteqartoqarpoq.
Killeqarfik pillugu isumaqatigiissut nutaaq arlalitsigut pingaaruteqartoq, nunanut allanut tunngasunut minsteri Villy Søvndahl oqarpoq.
- Killeqarfimmik isumaqatigiissumi pineqartut tassaapput aalisarnermut killeqarfik soorlu aamma aatsitassanik piginnittussaanermut apeqqutit qulakkeerneqartut, taamaattumik taakkua pillugit erseqqissaateqartoqarnissaa pingaaruteqarpoq aporaartoqarnissaa pinngitsoorneqassammat, Villy Søvndal Danmarksradiomi apersorneqarluni oqarpoq.
Killeqarfimmik isumaqatigiissut nutaaq iluarisimaarlugu Naalakkersuisut siulitaasuata Kuupik V. Kleist-ip tusagassiutinut nalunaaruteqarluni oqaatigaa.
- Nunat issittumiittut pillugit isumaqatigiissuteqarnermi siuariarneq iluarisimaaarpara. Ilulissani isumaqatigiissuteqarneq 2008-mi nalunaarut oqaasinnaanani naqissuserneqarpoq. Issittumi ineriartornerup ajunngitsumik ingerlaneranut isumalluarnarpoq, Naalakkersuisut siulittaasuat oqarpoq.
Isumaqatigiissummi nutaami arlalinnik minitaqartoqarpoq.
Soorlu killeqarfiup iluani uuliasiortitsiviit uuliamik gas-milluunniit nassaarpata killeqarfik qanoq inissinneqassanersoq isumaqatigiissummi ilanngunneqanngilaq.
Qeqertaq Kalaallit Nunaata Canadallu akornanniittoq Tartupaluk pillugu isumaqatigiissuteqartoqanngilaq.
Kalaallit Nunaata Canadallu Tartupaluk pigalugu nalunaarnikuupput, taanna siunissami pingaaruteqartumik inissisimalersinnaavoq, Canadap avannaa aqqusaarlugu Manerassuarmut imaatigut angallanikkut aqqusaarneqartalersinnaammat.
Isumaqatigiissummi nutaami Tartupaluup kikkunnit pigineqarneranut oqaloqatigiinnerup ingerlaqinneranut ammaassisuunissaa Villy Søvndal-ip neriuutigalu tusagassiuutinut nalunaarutigaa.
