Tartupaluk pillugu Canada aaqqiissutissamik ujartuivoq

Qeqertap Tartupaluup, Canadap Kalaallit Nunaatallu akornaniittup, naalagaaffimmit sorlermit oqartussaaffigineqarnerata assortuussutaanera Canadamit aaqqiiviginiarneqalerpoq.
Allattoq Jaaku Lyberth
aggustip 21-at 2010 13:06

Killeqarfiit erseqqisssumik ilisimaneqarnissaat aningaasarsiornikkut avatangisinullu pingaaruteqarnerat Canadap nunanut allanut ministeriarata Lawrence Cannonip nunanut allannut tunngassuteqartunik siullermeerluni nalunaaruteqarnermini taamanna erseqqisarpaa.

Tartupaluk naalagaaffimmit sorlermit oqartussaaffigineqarnersoq, Danmarkip Canadallu isumaqatigiinngissutigaat, taamatullu immap iluani misissuisinnaanerit kikkunnit oqartussaaffigineqarnersut aamma assortuussutaalluni.

Killeqarfik pillugu apeqqut uteqqiajuartoq suliassani pingarnertut inissinneqarpat siuariarnerussaaq, Lawrence Cannon oqarpoq.

Killeqarfik Tartupaluup eqqaaniittoq aamma Ualerngup imartaata, Beaufortip imartaata, killeqarfia pillugit Canada USA-imik Danmarkimillu isumaqatiginniarluni aallartippoq, Canadap nunanut allanut ministeria Lawrence Cannon nutaarsiassaqartitsivimmi Ritzauimi apersorneqarluni taamatut oqarpoq.

Naalagaaffiit Peqatigiit immat atorneqarnerat pillugu isumaqatigiissutaat 2013-imi atuutilersussap Canadap maleruarniarlugu nunanut allanut naalakkersuisup neriorsuutigaa, uppernarsaatillu piffissaq eqqorlugu tunniunniarlugit. Uppernarsaatit tunniunneqarnerisigut Canadap issittumi imartaani missisuisinnaanissaminut iluaqutigisussaavai.

Tartupaluk pillugu killeqarfilerngusaanneq ukioq 2004-imi aallarteqqippoq, Canadamiut sakkutuuvi ukioq taanna Tartupalummi sungiusarmata