Tarnit pissusiinik ilisimasalik Nanortaliliassaaq

Nanortalimmi ajunaarsorineqalersut pillugit Nanortalimmiunut misigissutitsigut ikiorsiisussanik tarnit pissusiinik ilisimasalinnik Nanortaliliartitsisoqartussanngorpoq. Taama nalunaarpoq Namminersornerullutik Oqartussani Ilaqutariinnermi pisortaqarfimmi pisortaagallartoq Gitte Jul.

- Tarnit pissusiinik ilisimasalik Nanortaliliartitassarput kalaallisut oqaaseqartuussanersoq imaluunniit nutserisuliinnarluta pissanersugut apeqqutigeqqaarparput. Kisianni soorunami kalaallisut oqaasilik Nanortaliliartussanngortipparput, Namminersornerullutik Oqartussani ilaqutariinnermi pisortaqarfimmi pisortaagallartoq Gitte Jul oqarpoq.

Taanna nassuiaavoq maannakkut Nanortallip kommunia suleqatigalugu kina aallartinneqassanersoq, aningaasartuutissat kiisalu qaqugu ikiorsiineq pissanersoq piareersaritsik.

Gitte Jul aperaarput qaqugu taava tarnit pissusiinik ilisimasalik Nanortalimmi ikiorsiisinnaalerumaarnersoq.

- Tassa Nanortalimmiit apeqquteqaatitsinnik tusagaqarniariarutta ikiorsiiartortussanik aallartitsissaagut. Apeqquteqaatigullu ilaatigut tassaapput, Nanortallip kommunia qanoq ikiorsiinissamut pilliuteqarsinnaanersoq, taava paasinarsissaaq aamma uagut qanoq pilliuteqarsinnaanersugut, Gitte Jul akivoq.

Taanna nangillugu aperineqarpoq, Namminersornerullutik Oqartussat tarnit pissusiinik aallartitsinerup saniatigut allatut ittumik qanoq ikiorsiisinnaanersoq.

- Taama pisoqartillugu annikitsuinnarmik taamaallaat iliuuseqarsinnaavugut, tuparujussuartoqarsimatillugu ikiuigasuarsinnaasarpugut, piffissamili sivisuumi katsorsagassanut ikiorsiingaarsinnaanata, Gitte Jul nassuiaavoq.

Nanortallip kommuniani inunnik isumaginninnermi pisortaq Peter Sonberg naapertorlugu Nanortalimmi inuit suli tupassimaqaat.

Inuit tupassimanerat pillugu inuusuttut ornittagaanni pisortaasoq inuusuttunut ippassaq unnukkut ataatsimiigiaqqusisimasoq aammattaaq oqaatigineqarpoq.