Tarnip pissusaanik immikkut ilisimasallit inatsisiliortoqarniarnera nuannaarutitigaat
Nunatsinnimi kinaluunniit imminut tarnip pissusaanik immikkut ilisimasalittut taasinnaavoq.
- Sullitatta amerlanertigut inuunerminni sanngiiffeqareersut imaluunniit inissisimaffimminni nanertuuteqareersut, ilumut qulakkeersinnaanngilaat ornitartik ilinniagaqarsimanermik tunaartaqarnersoq. Aammalu illuatungaani tarnip pissusaanik immikkut ilisimasallit akornatsinni toqqissisimanarinngilarput kinaluunniit ilinniakkamik tunaartaqarani tarnip pissusaanik immikkut ilisimasalittut imminut taagorsinnaammat, taamaaliornikkut ilinniagaqarnitsinni uppernassuserput apersuusersorneqarsinnaammat, tarnip pissusaanik immikkut ilisimasallit namminersortut sisamat tusagassiorfinnut nalunaaruteqarlutik taama allapput.
Aamma atuaruk Atassut: Tarnip pissusiinik ilisimasallit atuunnerat aalajangersaaffigineqarli
Danmarkimi tarnip pissussaanik immikkut ilisimasallit peqatatigiiffiata, Dansk Psykolog Foreningip, politikkia malillugu namminersulissagaanni ilinniakkap saniatigut immikkut allagartatigut akuerisaasuusimanissaq innersuussutigaa.
- Tamatuma Nunatsinni qulakkeerneqarnissaa soorunami aamma kissaatigaarput, tarnip pissusaanik immikkut ilisimasallit sisamaasut allapput.
- Ajoraluartumilli Nunatsinni inatsisaatsuuneq tunngavigalugu innuttaasoq ajunngitsumik kiffartuunneqartarnissaminik iluamik qulakkeerinnissinnaanngilaq. Tarnip pissusaanik immikkut ilisimasalik katsorsaanermini sullarlussinnaavoq sullitamut aarlerinartumik tarnikkut innarliisinnaalluni, peqqissaannginnerullu kingunerisinnaallugu inuttaasumut ajoqusiineq.
