Assi: Merete Lindstrøm

Jonna Ketwa: Tarnip pissusaanik ilisimasallit amerlasuut amigaataapput

Nunatsinni suliassat massakkutut itsillugit aaqqiiviginissaannut tarnip pissusaanik ilisimasallit pioreersut minnerpaamik pingasoriaataat pisariaqarput. Naak Naalakkersuisut pisariaqartitsinermik kisitsisileerusunngikkaluartut tarnip pissusianik ilisimasalik taama isumaqarpoq.

Naalakkersuisup, Ane Lone Baggerip nunatsinni tarnip pissussaanik ilisimasalinnik pisariaqartitsineq kisitsisilersinnaanngikkaa tarnip pissusaanik ilisimasallip Meeqqat Ikiortigimmilu siulittaasup, Jonna Ketwap pisariaqartitsineq eqqoriarpaa.

Taassuma meeqqanut inuusuttunullu susassaqarfiup suliassaani inuiaqatigiinni ajornartorsiutaangaatsiartut aaqqiiviginissaannut tarnip pissusaanik ilisimasallit minnerpaamik 150-it pisariaqartinneqassasorai.

- Tarnip pissusianik ilisimasallit, Dansk Psykologforeningimi ilaasortaasut nuna tamakkerlugu 50-it missaanniipput. Taakku pingasut sisamararterutaat suliamik isumaginnittarput. Ajornartorsiutimmi takullugit naammanngilaq, Jonna Ketwa oqarpoq.

Nunatsinni illoqarfinni annerni tarnip pissusaanik ilisimasallit pisariaqartitsitsinermut naammaqqatartut ilinniartunullu siunnersuisarfimmi tarnip pissusianik ilisimasalimmut neqerooruteqarfiusuni utaqqisorpassuuginnaavissut Jonna Ketwap nassuiaatigaa.

Taanna naapertorlugu tarnip pissusaanik ilisimasallit amerlasuut misilittagaasa naammannginnerat ajornartorsiutip aapparaa. Taamaammat tarnip pissusaanik ilisimasallit amerlanerusut misilittagaqarnerusullu pisariaqartinneqarput.

AAMMA ATUARUK Tarnip pissusaanik ilisimasallit qassit pisariaqartinneqarnersut ilisimaneqanngitsoq

Tarnip pissusaanik ilisimasallit oqartussanik namminersortunilu arlalinni atorfeqarnerat pissutigalugu pisariaqartitsinermut ataatsimoortumik paasissutissaqanngitsoq, Ane Lone Baggerip §37-mut akissuteqaataani allassimavoq.

Aamma: Tarnip pissusianik ilisimasallit peqatigiiffiata ilisimatitsissutigaa: utaqqisut nalunaarsorsimanerisa ersersikkaat amerlanerusunik pisariaqartitsisoqartoq, kisitsimmilli taasinatik.

Naalakkersuisut nammineq akissuteqanngillat

Naalakkersuisut ajornartorsiutaasunik aaqqiiniarnissamut tarnip pissusaanik ilisimasalinnik qanoq amerlatigisunik pisariaqartitsisoqarneranik namminneerlutik kisitsisiliinngillat.

Psykologforeningi Naalakkersuisutut akissuteqarluni KNR-imut allappoq. Psykologforeningip pisariaqartitsineq kisitsisilerusunngilaa, taamaakkaluartorli annertunerusumik akissuteqarpoq. Peqatigiiffik ilaatigut allappoq: Ataatsimoortumik kisitsisiliisinnaanngikkaluarluta, Kalaallit Nunaanni tarnip pissusianut tunngatillugu suliassat eqqarsaatigalugit tarnip pissusaanik ilisimasallit amerlanerusut pisariaqartinneqartut nalilersinnaavarput. Ajornartorsiutaasut uppernarsaatigineqartut assersuutigalugu Innuttaasunik 2018-imi misissuinermi aamma Kalaallit Nunaanni pimmatiginnittarneq pillugu misissueqqaarnermi Helle Rabølip suliaanik allanillu saqqummersut tunngavigalugit tarnip pissusaanik ilisimasallit Kalaallit Nunaanni pisariaqartinneqartut pioreersunit amerlanerungaatsiartut nalilerparput.

tarnip pissusaanik ilisimasallit Kalaallit Nunaanni pisariaqartinneqartut pioreersunit amerlanerungaatsiartut

Suliffimmi atugassarititaasut pitsaanerusut pioreersut atatiinnarsinnaagaat

Taamaammat Jonna Ketwap amerlanerungaatsiartut pisariaqartinneqarnerat isumaqatigaa. Aammali tarnip pissusaanik ilisimasallit pioreersut paarilluarneruneqartariaqarsorai. Tamanik ikiuiniarluni suleruluttoqarnera pissutigalugu tarnip pissusaanik ilisimasallit namminneq aamma aporfeqalersinnaapput.

- Isumaginnittoqarfimmi taamaattoqartariaqarpoq, pissutigalugu kingunerluttoqarnissaanut, uippakajaalernissamut allanillu kinguneqarnissaanut aarlerinartoqarmat, Jonna Ketwa oqarpoq.

Naalakkersuisup Martha Abelsenip Danmarkimi ministerit nutaat marluk ataasinngornermi ataatsimeeqatigai, ataatsimiinnissaminullu Danmarkimit isumaginninnikkut suut tapersiissutigineqarnissaanut kissaatiginerlugit allattorsimaffimmik nassataqarluni. Tassanilu suliamut tunngatillugu ilisimasallit katsorsaanermi ilaasinnaasut ilaatigut eqqaaneqarput.

Tarnilli pissusaanik ilisimasallit qanoq amerlatigisut pisariaqartinneqarnerannut Ane Lone Baggerip §37-mut apeqqummut ilisimatitsissutigisaani ilisimaneqanngitsutut allassimanera tunngavigalugu sulisussanik amerlanerusunik pisariaqartitsinerup erseqqissarnissaa ajornakusoorsinnaavoq.

AAMMA ATUARUK Martha Abelsenip Danmarkimut kissaatai aajuku

 

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat