Tarnimikkut napparsimasut perorsaasussaaleqinermit aamma eqqorneqartarput

Perorsaasunik ilinniarsimasunik amigaateqarnerujussuaq tarnimikkut napparsimasut kiffartuunneqarnerannut aamma tuniluuppoq.

Kommunerpaalussuarni ineqarfiit ataatsimoorussat pilersinneqarsimalerput. Tarnimikkut napparsimasut ineqarfinni arlalialunnguakkuutaarlutik najugaqartarput perorsaasunik sulisoqarlutik, perorsaasunilli ilinniarsimasunik amigaateqarneq pisuulluni napparsimasut nammineertinniarnerat kinguarsarneqartarpoq. Ineqarfiit ineqartullu qasserpiaanersut nalunaarsorneqanngilaq, naatsorsuutigineqarsinnaavorli ineqarfiit 30-t missaaniittut, ineqartullu immaqa 50-it missaanniillutik.

Tamakku ilaat Sungiusarfik Aaqamut Nuummiittumut sungiusartikkiartorneqartarput, sungiusarneqarerlutillu kommuniminnut angerlartussanngoraangata perorsaasunik sulisussaaleqineq aporfinngortartoq Aaqap pisortaa Ivalo Møller Lange oqaluttuarpoq.

Tarnimikkut napparsimasut amerlasuutigut skizofreniimik nappaateqartuusarput. Nappaat isummamik misigissutsinillu allanngortitsisarpoq, taamalu napaatillit ikiorteqarnissamik pisariaqartitsisarput. Perorsaasunik iliniarsimasunik amigaateqarneq inuit taama nappaatillit nammineersinnaalernissaannut kinguarsaataasartoq Ivalo Møller Lange isumaqarpoq.

-Siuariarnerigaluat maangaannartarpoq, unittoortarpullu mattussinnaasarlutillu, taamaalillutillu inuiaqatigiinnut akuliullutik namminnerniarnissaraluat aamma kinguarsarneqartarluni, Ivalo Møller Lange nassuiaavoq.

Perorsaasunik ilinniarsimasunik amigaateqarneq illuatungilerneqassappat innarluutilinnik sullissisut ilinniarsimanngitsut ilinniartinneqarnissaat aqqutissanut ilaasoq Ivalo Møller Lange isumaqarpoq.